नेपाललाई जस्तोसुकै सहयोग गर्न अमेरिका तयार छ : अमेरिकी राष्ट्रपति ट्रम्प
काठमाडाैं, १२ भदौ । अमेरिकी राष्ट्रपति डोनाल्ड ट्रम्पले बाढी र पहिरोबाट प्रभावित नेपाललाई आवश्यक सबै प्रकारका सहयोग गर्ने प्रतिबद्धता व्यक्त गर्नुभएको छ । ह्वाइट हाउसमा आयोजित एक समारोहपछि सञ्चारकर्मीहरूसँग सङ्क्षिप्त कुराकानी गर्दै उहाँले नेपालको विपद्प्रति सहानुभूति प्रकट गर्दै सहयोगको आश्वासन दिनुभएको हो ।
अमेरिकी समाचार संस्था एनबिसी न्यूजका अनुसार राष्ट्रपति ट्रम्पले बिहीबार ह्वाइट हाउसमा लेक ओन्टारियोको नाम परिवर्तनसम्बन्धी कार्यकारी आदेशमा हस्ताक्षर गर्नुभएको थियो । सोही कार्यक्रमको अन्त्यमा सञ्चारकर्मीको जिज्ञासाको जवाफ दिँदै उहाँले भन्नुभयो, “नेपाललाई आवश्यक पर्ने जस्तोसुकै सहयोग गर्न अमेरिका तयार छ ।”
राष्ट्रपति ट्रम्पले भोटेकोशी नदीमा आएको विनाशकारी बाढीबाट भएको ठुलो क्षतिबारे नेपाली अधिकारीहरूसँग जानकारी लिएको समेत बताउनुभयो । उहाँले नेपाललाई संकटको यस घडीमा मद्दत गर्न अमेरिका तत्पर रहेको जानकारी नेपाली पक्षलाई गराइसकेको उल्लेख गर्नुभयो ।
नेपालमा भोटेकोशीको बाढीले सैयाैँको ज्यान लिएको र ठुलो भौतिक क्षति पुर्याएको खबर अन्तर्राष्ट्रिय सञ्चार माध्यमहरूमा प्राथमिकताका साथ सार्वजनिक भइरहेका बेला राष्ट्रपति ट्रम्पको यो भनाइ आएको हो । यस प्रतिबद्धतासँगै अमेरिकाले नेपालका लागि विशेष राहत वा उद्धार प्याकेज घोषणा गर्न सक्ने अपेक्षा गरिएको छ ।
