पुस्तक परिचय

नेपाली र अंग्रेजी अनुवाद सहितको शायरी संग्रह ‘म मैन झैं पग्लिरहेँ’

पुस्तक परिचय

त्यो पुरानो घाउ अझै ताजै राखेको छु
चहराइरहेको घाउको मजा अझै लिइरहेको छु ।

साहित्यकार डा. अजय क्रान्ति शाक्यको काव्य अभिव्यक्तिको एक पंक्ति । मनभित्र गुम्सिएका विविध भावहरूलाई उहाँले शायरीको माध्यमबाट अभिव्यक्त गर्नुभएको छ । त्यसरी अभिव्यक्त गरिएका शायरीहरूको संग्रह पनि हालै मात्र प्रकाशित भएको छ– ‘म मैन झैँ पग्लिरहेँ’ । पुस्तकको शीर्षकले नै बताउँछ, लेखक शाक्यका अभिव्यक्तिहरू अत्यन्त कोमल छन्, संवेदनशील छन् ।

त्यसो त प्रेम आफै पनि एक संवेदनशील विषय हो । मानिस जतिसुकै कठोर किन नहुन्, प्रेमले उसलाई कोमल बनादिन्छ । जो आफै कोमल छ, उसलाई मैन झैं पग्लाइदिन्छ । शायद यही त हो प्रेमको जादू !

डा. शाक्यको ‘म मैन झैं पग्लिरहेँ’ यस्तै २०० वटा कोमल शायरीहरूको संग्रह हो । यसमा मूल शायरी सँगै अंग्रेजी अनुवाद पनि राखिएको छ । पुस्तकको शीर्षकलाई अंग्रेजीमा नाम दिएको छ– I Kept Melting Like a Candle.

यसरी दुई महत्वपूर्ण भाषामा आएको यो पुस्तक द्विभाषिक शायरी संग्रह बनेको छ । नेपाली काव्य क्षेत्रमा अंग्रेजी र नेपाली दुवै भाषा सँगै राखेर प्रकाशन भएको सम्भवतः यो नै पहिलो शायरी संग्रह हुनुपर्दछ । यसको अंग्रेजी अनुवादले नेपाली साहित्यलाई अन्तर्राष्ट्रिय बजारमा समेत पुर्याउन सहयोग पुग्ने विश्वास लिन सकिन्छ ।

डा. शाक्य मूलतः एक समाजसेवी र राजनीतिक व्यक्तित्व हुनुहुन्छ । उहाँ बागमती प्रदेशमा नेकपा (एमाले) का निर्वाचित सांसद एवं पूर्व मन्त्री समेत हुनुहुन्छ । उहाँको अधिकांश समय राजनीति र समाजसेवामै व्यतित भइरहेको हुन्छ । तर व्यस्त सामाजिक जीवनका वावजूद पनि उहाँ भित्रको कवि व्यक्तित्व भने विलुप्त हुन पाएको छैन ।

नेपाली राजनीतिमा साहित्यिक व्यक्तित्व समेत बोकेका राजनीतिक नेताहरू अरु पनि छन्, तर धैरै छैनन् । ती थोरै व्यक्तित्वहरुमा उहाँ पनि पर्नुभएको छ ।
प्रस्तुत शायरी संग्रहमा उहाँका प्रेम, जीवनदर्शन र आदर्शका भावहरू अभिव्यक्त भएका छन् । जस्तो:

मानिस भन्दा देवता धेरै रहेछन् मेरो शहरमा
देवताको भीडमा म आफैै हराएँ मेरो शहरमा ।

उहाँको शायरीमा नास्तिक भावका पंक्तिहरू पनि थुप्रै भेटिन्छन् । उहाँ बौद्ध दर्शनका विज्ञ समेत भएको कारणले पनि हुनुपर्छ, उहाँले अन्धविश्वासमा टेकेर होइन प्रज्ञाज्ञान र विपश्यना साधनायुक्त आध्यात्मिक जीवन शैली जिउने अभ्यास गर्नुृहुन्छ । उहाँको यो सात्विक जीवन शैलीको छनक पनि उहाँका शायरीहरूमा छरपस्त रहेको भेटिन्छ ।

शीर झुकाइदिए ढुंगा पनि देवता हुन्छ
हातले मिल्काइदिए दुई कौडीको हुन्छ ।
———

मानिस भन्दा देवता धेरै रहेछन् यो शहरमा
देवताको भीडमा म आफै हराएँ मेरो शहरमा ।

मानिस जब अहंकारी बन्छ, तब ऊ जतिसुकै उच्च पदमा पुगे पनि असल मानिस बन्न सक्दैन । अहंकारी मानिसले आफू मात्र होइन समाजलाई पनि भ्रष्टीकरण गराइदिनछ । समाजमा यो नैतिक शिक्षा पुर्याउन उहाँले लेख्नुभएको छः

न जिन्दगी आफूले भने जस्तो न त मृत्यु आफूले सोचे जस्तो
तैपनि घमण्ड मानिसको आफैलाई बादशाह सम्झिरहे जस्तो ।
———-

जता गए पनि उतै उज्यालो छर्दै जान्छ
चिराग आफू सकिँदै बाटो देखाउँदै जान्छ ।

विशेष गरी प्रेमका अभिव्यक्ति दिनकै लागि शायरहरूले शायरीको अत्यधिक प्रयोग गरेको पाइन्छ । उहाँले पनि संग्रहमा प्रेमका धेरै अनुभूतिहरू सम्प्रेषण गर्नुभएको छ । उहाँका प्रेमका अभिव्यक्ति अझ चोटिला छन् । जस्तो :

जसलाई नाफा चाहिन्छ उसले व्यापार गरे हुन्छ
प्यारको हिसाबमा त सधैँ नोक्सानी मात्रै हुन्छ ।
———–

मैले बोल्न गएँ त उनको भाउ महँगो हुन थाल्यो
एकतर्फी प्यार गर्नेहरूको भाउ सस्तो हुन थाल्यो ।
———–

मेरो जपना तपना सपना सबैमा आयौ तिमी
आउन त आयौ घना बादल बनी आयौ तिमी ।

प्रेमले मानिसलाई प्रेमी मात्रै बनाउँदैन । सके त्यसले मानिसलाई मानिस बाहेक अर्थोक सबै बनाइदिन सक्छ । यस्तै उहाँका प्रेमिल अभिव्यक्तिः

बेहिसाब प्यार गरेँ मेरो सबथोक लुटाएँ उनलाई
हिसाब नमागेरै होकि जिन्दगीले माग्ने बनायो मलाई ।
———–

सहनै नसक्ने चोट दियौ एक प्यालाले नपुग्ने बनायौ
अरुलाई मन्दिर पठायौ मलाई भट्टी जाने बनायौ ।
————

जसको लागि बदनाम भएँ सबथोक गुमाएँ
आज उनैले चिन्न छोडिछन् कस्तो प्रेम गरेँ ।

नेपाली साहित्य र संस्कृतिको क्षेत्रमा रचनात्मक गतिविधिहरू सञ्चालन गर्ने उद्देश्यले स्थापित नेपालमण्डल लिट्रेचर कल्चर ट्रष्टबाट प्रकाशित यो शायरी संग्रह काव्य पारखी पाठकहरूका लागि रुचिकर लाग्ने विश्वास गर्न सकिन्छ ।
नेपाली र अंग्रेजी दुवै भाषा सहित १२० पृष्ठको यो पुस्तकको मूल्य रु. ३०० राखिएको छ ।