सुक्खा पहिरोले जिप पुरिँदा पाल्पामा तीनजनाको मृत्यु, ८ घाइते

पाल्पा, १३ भदौ । पाल्पाको रिब्दिकोट गाउँपालिका–२ जोर्तेमा सुक्खा पहिरो जाँदा तीनजनाको मृत्यु भएकाे छ भने ८ जना घाइते भएका छन् ।

गुल्मीबाट पाल्पातर्फ आउँदै गरेको लु१ज ४६०० नम्बरको जिप पाल्पाको जोर्तेमा माथिबाट खसेको सुक्खा पहिरोले पुरिएकाे हाे ।

पहिरोमा परी ३ जनाको घटनास्थलमै मृत्यु भएको र तीन बच्चासहित ८ जनालाई उद्धार गरिएको जिल्ला प्रहरी कार्यालय पाल्पाका सूचना अधिकारी एवम प्रहरी नायव उपरीक्षक वीरेन्द्र थापाले जानकारी दिनुभयो ।

मृत्यु हुनेमा दुई पुरुष र एक महिला रहेका छन् । उनीहरुको सनाखत हुन सकेको छैन ।

दुर्घटनामा घाइते भएकाहरुलाई उपचारका लागि पाल्पा मिसन अस्पताल र लुम्बिनी मेडिकल कलेज प्रभास लगिएको जिल्ला प्रहरी कार्यालयले जनाएको छ । पहिरोले पाल्पा–गुल्मी सडक खण्ड संचालन भएको छैन।