काठमाडौं, २९ असोज। नेपाली बजारमा सुनको मूल्यले दिनदिनै नयाँ कीर्तिमान कायम गरिरहेको छ। बुधबार सुनको मूल्य तोलामा थप ४०० रुपैयाँले बढेको छ।

नेपाल सुनचाँदी व्यवसायी महासंघका अनुसार, बुधबारका लागि सुनको भाउ प्रतितोला २ लाख ४८ हजार ९ सय रुपैयाँ तोकिएको छ। यो मूल्य अघिल्लो दिनको तुलनामा ४०० रुपैयाँले बढी हो। मंगलबार सुन प्रतितोला २ लाख ४८ हजार ५ सय रुपैयाँमा कारोबार भएको थियो।

गत शुक्रबारयता सुनको मूल्यले निरन्तर नयाँ रेकर्ड बनाउँदै आएको छ। गत शुक्रबार सुन प्रतितोला २ लाख ३५ हजार रुपैयाँमा कारोबार भएको थियो।

यसैबीच, चाँदीको भाउ भने उच्च मूल्य रेकर्डबाट आज घटेको छ। अघिल्लो दिन प्रतितोला ३ हजार ३२५ रुपैयाँमा कारोबार भएको चाँदी बुधबार ८५ रुपैयाँले घटेर ३ हजार २४० रुपैयाँमा झरेको महासंघले जनाएको छ।