फिदिम नगरपालिका ‘पूर्ण खोप सुनिश्चित’ घोषित : कोशी प्रदेशकै पहिलो नगरपालिका
काठमाडौँ, माघ २४ । पाँचथरको फिदिम नगरपालिकालाई ‘पूर्ण खोप सुनिश्चितता तथा दिगोपना’ नगरपालिका घोषणा गरिएको छ । नगरपालिकाभित्रका लक्षित उमेर समूहका सबै बालबालिकाले १५ महिनाभित्र पाउनुपर्ने सबै प्रकारका खोप लगाएको सुनिश्चित भएपछि शुक्रबार एक समारोहका बीच यो घोषणा गरिएको हो ।
नगरपालिकाका अनुसार १६ देखि २३ महिनासम्मका २७३ जना बालबालिकाले राष्ट्रिय खोप तालिका अनुसारका सबै खोप पूर्ण रूपमा लगाएका छन् । त्यस्तै, १५ महिनाभन्दा कम उमेरका ५६२ जना बालबालिकाले निर्धारित समय तालिका अनुसार नियमित रूपमा खोप लिइरहेको पाइएको छ । नगरपालिकामा खोप नलगाएका बालबालिकाको सङ्ख्या शून्य रहेको छ ।
नगर प्रमुख मित्रप्रसाद काफ्लेले यस वर्ष फिदिम नगरपालिका पूर्ण खोप सुनिश्चितता घोषणा गर्ने कोशी प्रदेशकै पहिलो नगरपालिका बनेको जानकारी दिनुभयो। यद्यपि, पाँचथरकै हिलिहाङ र याङवरक गाउँपालिकाले भने यसअघि नै यो उपलब्धि हासिल गरिसकेका छन् । ४७ हजार ८१० जनसङ्ख्या रहेको यस नगरपालिकामा ५ वर्षमुनिका बालबालिकाको सङ्ख्या करिब २ हजार ४ सय ५२ रहेको छ ।
जिल्ला खोप समन्वय समितिका सदस्य सचिव एवं स्वास्थ्य कार्यालय पाँचथरका प्रमुख महेश सुनारले नगर प्रमुख काफ्लेलाई पूर्ण खोप सुनिश्चितताको प्रमाणपत्र हस्तान्तरण गर्नुभयो। सोही अवसरमा खोप अभियानलाई सफल बनाउन उत्कृष्ट योगदान पुर्याउने विभिन्न निकाय र व्यक्तिहरूलाई सम्मान समेत गरिएको थियो:
उत्कृष्ट वडा : वडा नं. ९ (लुम्फाबुङ) – सबैभन्दा पहिले घोषणा गर्ने वडा
उत्कृष्ट स्वास्थ्य संस्था : लालीखर्क स्वास्थ्य चौकी र रानीटार स्वास्थ्य चौकी
उत्कृष्ट स्वास्थ्यकर्मी : मञ्जु सेलिङ र रमादेवी न्यौपाने
उत्कृष्ट महिला स्वास्थ्य स्वयंसेविका : नरमाया रिमाल
यस घोषणाले नगरपालिकाको स्वास्थ्य सूचकाङ्कमा महत्त्वपूर्ण सुधार आएको र बालबालिकाको स्वास्थ्य सुरक्षा सुनिश्चित भएको स्वास्थ्य कार्यालयले जनाएको छ । ट्राफिक प्रहरीले जस्तै स्वास्थ्य क्षेत्रमा पनि नियम र मापदण्डको पालनाले नागरिकको जीवनस्तर उकास्न मद्दत पुग्ने विश्वास व्यक्त गरिएको छ ।
