सौराहामा २०औँ ‘फुड फेस्टिबल’ भोलिदेखि: पर्यटन पुनरुत्थान र सांस्कृतिक प्रवर्द्धन गर्ने लक्ष्य

काठमाडौँ, चैत ११ ।  चितवनको पर्यटकीय नगरी सौराहामा भोलि (चैत १२ गते) देखि २०औँ संस्करणको ‘फुड फेस्टिबल’ (खाद्य महोत्सव) आयोजना हुने भएको छ। रेष्टुराँ एण्ड बार एसोसिएसन नेपाल (रेवान) सौराहाको आयोजनामा हुने यो महोत्सव चैत १४ गतेसम्म सञ्चालन हुनेछ।

महोत्सवको तयारी र उद्देश्य
महोत्सव सौराहाको गैँडाचोकस्थित छत्री स्ट्रिटमा आयोजना गर्न लागिएको र यसको तयारी अन्तिम चरणमा पुगेको रेवानका महासचिव नवीन नेपालले जानकारी दिनुभयो। ‘प्राकृतिक सौन्दर्यता, चितवन सौराहाको विशेषता’ भन्ने मूल नाराका साथ आयोजना हुन लागेको यस फेस्टिबलले आन्तरिक तथा बाह्य पर्यटन प्रवर्द्धन गर्ने लक्ष्य राखेको छ।

यसअघि फेब्रुअरीमा प्रणय दिवस (भ्यालेन्टाइन डे) को अवसरमा आयोजना गर्ने भनिएको यो कार्यक्रम निर्वाचन गतिविधिका कारण सुरक्षा र व्यवस्थापनमा पर्न सक्ने असरलाई मध्यनजर गर्दै स्थगित गरिएको थियो। महोत्सवका संयोजक कृष्णप्रसाद खतिवडाले अहिले नयाँ मिति तय गरी व्यावसायिक उत्साह भर्न लागिएको बताउनुभयो।

प्रमुख आकर्षणहरू
विगत १९ वर्षदेखि निरन्तर आयोजना हुँदै आएको यस महोत्सवमा यस वर्ष निम्न आकर्षणहरू रहनेछन् ।

• विभिन्न जातजातिको परम्परागत झाँकी प्रस्तुति

• राष्ट्रिय तथा स्थानीय कलाकारहरूको साङ्गीतिक कार्यक्रम

• स्थानीय तथा जनजातीय खानाका स्टलहरू र खाना प्रदर्शनी प्रतियोगिता

• पर्यटन क्षेत्रमा कार्यरत जनशक्तिका लागि ‘वेटर–वेट्रेस’ प्रतियोगिता

आर्थिक अपेक्षा र सहभागिता
आयोजकका अनुसार महोत्सव सम्पन्न गर्न करिब ६० लाख रुपियाँ  खर्च हुने अनुमान गरिएको छ। तीन दिनसम्म चल्ने महोत्सवमा झन्डै रु १ करोड बराबरको आर्थिक कारोबार हुने अपेक्षा गरिएको छ। त्यस्तै, दैनिक औसत ५ हजार पर्यटकले महोत्सवको अवलोकन गर्ने आयोजकको दाबी छ।

लामो समयदेखि सुस्ताएको सौराहाको पर्यटन व्यवसायलाई यस महोत्सवले नयाँ उचाइ दिने र स्थानीय व्यवसायी एवं समुदायमा सकारात्मक सन्देश प्रवाह गर्ने विश्वास लिइएको छ।