सांस्कृतिक संस्थानको ५४औँ वार्षिकोत्सव : असार ३ देखि राष्ट्रिय दोहोरी गीत प्रतियोगिता हुने

काठमाडौँ, जेठ २७ । सांस्कृतिक संस्थान (राष्ट्रिय नाचघर) ले आफ्नो ५४औँ वार्षिकोत्सवको उपलक्ष्यमा ‘सांस्कृतिक संस्थान राष्ट्रिय दोहोरी गीत प्रतियोगिता-२०८१’ (समाचारमा उल्लेखित २०८३) आयोजना गर्ने भएको छ । नेपाली लोक संस्कृतिको संरक्षण, संवर्द्धन र नयाँ पुस्तामा हस्तान्तरण गर्ने उद्देश्यका साथ आगामी असार ३ देखि ५ गतेसम्म संस्थानको केन्द्रीय कार्यालय जमलमा यो प्रतियोगिता सञ्चालन हुनेछ ।

संस्थानका महाप्रबन्धक किरणबाबु पुनका अनुसार प्रतियोगितामा देशभरबाट छनोट भएका २५ वटा समूहले प्रतिस्पर्धा गर्नेछन् । मौलिक लोक सिर्जनालाई प्रोत्साहन गर्न आयोजना गरिएको यस कार्यक्रमले लोक गायनको क्षेत्रमा नयाँ प्रतिभा पहिचान गर्ने विश्वास लिइएको छ ।

पुरस्कार तथा सुविधाहरू
प्रतियोगितामा प्रथम हुने समूहले दुई लाख र दोस्रो हुनेले एक लाख नगद पुरस्कार प्राप्त गर्नेछन् । यसबाहेक विभिन्न विधामा उत्कृष्ट हुने सर्वोत्कृष्ट वेषभूषा तथा आभूषण, सर्वोत्कृष्ट सांस्कृतिक भावयुक्त प्रस्तुति, सर्वोत्कृष्ट गायक र गायिकालाई जनही  २५ हजारका दरले पुरस्कार प्रदान गरिने संस्थानले जनाएको छ । 

पुरस्कारको साथमा विजेता र उपविजेताहरूलाई सांस्कृतिक संस्थानको आफ्नै अत्याधुनिक स्टुडियोमा गीत रेकर्डिङ गर्ने अवसर प्रदान गरिनेछ । साथै, उत्कृष्ट प्रतिभाहरूलाई संस्थानले सञ्चालन गर्ने ६ महिने निःशुल्क कला प्रशिक्षण (गायन विधा) मा समेत समावेश गरिनेछ ।

निर्णायक मण्डल र विशेष प्रस्तुति
प्रतियोगिताको निष्पक्ष मूल्याङ्कनका लागि वरिष्ठ लोक कलाकारहरूको निर्णायक मण्डल गठन गरिएको छ। जसमा दुर्गा रायमाझी, चन्द्र शर्मा, राधिका हमाल, सीता थापा, कृष्ण रेउले, दीपक खड्का र सुवास केसी रहनुहुनेछ। प्रतियोगिताको थप आकर्षणका रूपमा चर्चित लोक गायकहरू राजु परियार, राजु ढकाल र देवी घर्तीको विशेष साङ्गीतिक प्रस्तुति समेत रहनेछ ।

विसं २०१६ मा ‘राष्ट्रिय नाचघर’ को रूपमा स्थापना भएको यो संस्थालाई विसं २०२९ मा सांस्कृतिक संस्थानका रूपमा पुनर्गठन गरिएको थियो। संस्थानले लामो समयदेखि नेपाली नाटक, गीत र नृत्यको जगेर्नाका लागि विभिन्न कार्यक्रमहरू सञ्चालन गर्दै आएको छ ।