खानेपानी र सरसफाइ सुधारका लागि एडिबीद्वारा साढे ११ करोड डलर सहुलियत ऋण स्वीकृत

काठमाडौँ, ५ असार । एसियाली विकास बैंक (एडिबी) ले नेपालका नगरपालिकाहरूमा खानेपानी र सरसफाइ सेवा सुधारका लागि ११ करोड ५० लाख अमेरिकी डलर (करिब साढे ११ करोड डलर) बराबरको सहुलियतपूर्ण ऋण स्वीकृत गरेको छ।

एडिबीका अनुसार यस सहायता रकमलाई ‘एकीकृत खानेपानी आपूर्ति तथा ढल व्यवस्थापन परियोजना’ मा परिचालन गरिनेछ। यस परियोजनाबाट देशका १३ वटा जिल्लाका ८ लाख ५० हजारभन्दा बढी नागरिकहरू प्रत्यक्ष रूपमा लाभान्वित हुनेछन्। परियोजनाले सहरी क्षेत्रमा सुरक्षित खानेपानीको पहुँच विस्तार गर्नुका साथै ढल तथा फोहोरपानी व्यवस्थापन प्रणालीलाई सुदृढ बनाउन महत्वपूर्ण भूमिका खेल्नेछ।

नेपालमा भइरहेको तीव्र सहरीकरणका कारण सहरी क्षेत्र र भौतिक पूर्वाधारहरूमा अत्यधिक चाप बढ्दै गइरहेको एडिबी नेपालका कन्ट्री डाइरेक्टर आर्नो कोश्वाले बताउनुभयो।

“तीव्र सहरीकरणका कारण धेरैजसो समुदायहरू सुरक्षित खानेपानी र आधारभूत स्वास्थ्य सुविधा पाउनबाट वञ्चित भइरहेका छन्,” कन्ट्री डाइरेक्टर कोश्वाले भन्नुभयो, “यो नयाँ परियोजना सञ्चालनमा आएपछि खानेपानी र सरसफाइ सेवामा आम नागरिकहरूको पहुँच थप प्रभावकारी रूपमा अभिवृद्धि हुने हामीले आशा राखेका छौँ।”