इरान र अमेरिकाबीच स्विजरल्याण्डमा वार्ता: पहिलो चरण सम्पन्न, इरानी टोलीद्वारा फोटो खिचाउन र हात मिलाउन अस्वीकार

बुरगेनस्टोक (स्विजरल्याण्ड)। कतार र पाकिस्तानको मध्यस्थतामा इरान र अमेरिकाबीच स्विजरल्याण्डमा सुरु भएको उच्चस्तरीय वार्ताको पहिलो चरण सम्पन्न भएको छ । मध्यपूर्वमा बढ्दो तनाव र जारी युद्ध अन्त्यका लागि स्विजरल्याण्डको बुरगेनस्टोकमा दुई देशबीच प्रत्यक्ष वार्ता सुरु भएको हो ।

इरानी टोलीको नेतृत्व र मुख्य उद्देश्य
इरानको तर्फबाट वार्ता टोलीको नेतृत्व संसदका सभामुख मोहम्मद बागेर गालिबाफ र विदेशमन्त्री अब्बास अराघचीले गरेका छन् । इरानी टोलीले युद्ध अन्त्यका लागि गरिएको ‘अन्तरिम सम्झौता’ लाई सबै पक्षले पूर्ण रूपमा कार्यान्वयन गराउनु नै आफ्नो मुख्य लक्ष्य रहेको बताएको छ ।

फोटो र हात मिलाउन अस्वीकार
वार्ताको सुरुवातमा इरानी प्रतिनिधिमण्डलले अमेरिकी टोलीसँग सामूहिक तस्बिर खिचाउन र हात मिलाउन  अस्वीकार गरेको छ । इरानको अर्ध-सरकारी समाचार संस्था ‘तस्निम’ का अनुसार, बैठकका आयोजकहरूले दुई देशका प्रतिनिधिहरूबीच हात मिलाउने र फोटो खिचाउने कार्यक्रम तय गरेका थिए, तर इरानी पक्षले त्यसमा सहभागी हुन मानेन ।

इरानी टोलीले फोटो सेसन र सञ्चारमाध्यमको उपस्थिति सकिएपछि मात्र हलमा प्रवेश गरेको थियो । अमेरिकी अधिकारीहरूले पत्रकारहरूलाई बाहिर पठाउन पाँच मिनेटको समय माग गरेपछि मात्र औपचारिक वार्ता सुरु भएको जनाइएको छ ।

हर्मुज जलडमरू र लेबनान युद्धको छाया
वार्ता चलिरहँदा इरानले इजरायलद्वारा लेबनानमा भइरहेको निरन्तर आक्रमणको विरोधमा रणनीतिक रूपमा महत्त्वपूर्ण मानिने ‘हर्मुज जलडमरू’ पुनः बन्द गरेको दाबी गरेको छ । यद्यपि, अमेरिकी सेनाले भने उक्त जलमार्ग सबै जहाजका लागि खुल्ला रहेको बताएको छ ।

यसैबीच, लेबनानमा ‘युद्धविराम’ घोषणा गरिए पनि हिंसा रोकिएको छैन । पछिल्ला केही दिनमा हिजबुल्लाहको आक्रमणमा परी ६ इजरायली सैनिकको मृत्यु भएको छ भने २० जना घाइते भएका छन् । इजरायली सेनाले पनि लेबनानमा दर्जनौं मानिसको हत्या गरेको रिपोर्टहरू सार्वजनिक भएका छन् ।

लामो समयको शत्रुता र क्षेत्रीय तनावका बीच हुन लागेको यो वार्तालाई विश्व समुदायले चासोका साथ हेरेको छ । पहिलो चरणको वार्ता सकिए पनि अर्को चरणको छलफल कहिले हुन्छ भन्नेबारे औपचारिक जानकारी दिइएको छैन ।(स्रोतः अन्तराष्ट्रिय न्यूज एजेन्सी)