चौबिस घण्टामा विपद्का ६२ घटना: सर्पदंशबाट दुईको मृत्यु, ११ प्रमुख सडक अवरुद्ध हुँदा जनजीवन अस्तव्यस्त
काठमाडौँ, ५ साउन । मनसुनको सक्रियतासँगै देशका विभिन्न भागमा बाढी, पहिरो र सर्पदंश जस्ता विपद्का घटनाहरू तीव्र भएका छन्। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार पछिल्लो २४ घण्टामा मुलुकभर विपद्जन्य ६२ वटा घटनाहरू अभिलेख गरिएका छन्, जसले ४७ जिल्लालाई प्रत्यक्ष प्रभावित पारेको छ।
प्राधिकरणकी प्रवक्ता शान्ति महतका अनुसार, पछिल्लो २४ घण्टामा भएका विभिन्न घटनामा परी २ जनाको मृत्यु भएको छ भने १५ जना घाइते भएका छन्। मृत्यु हुने दुवै जना सर्पदंशका हुन्। सर्पदंशका १३ वटा घटनामा २ जनाको मृत्यु र ११ जना घाइते भएका छन्। यो विपद्बाट ९ जिल्ला प्रभावित भएका छन्।
देशभर २६ वटा पहिरोका घटनाहरू भएका छन्, जसमा परी २ जना घाइते भएका छन्। पहिरोले १८ जिल्लाका विभिन्न बस्ती र पूर्वाधारमा क्षति पुर्याएको छ। प्राधिकरणको दैनिक बुलेटिन अनुसार, बाढी र पहिरोका कारण देशभरका ११ वटा सडक खण्डहरू पूर्ण वा आंशिक रूपमा अवरुद्ध भएका छन्, जसले गर्दा लामो तथा छोटो दुरीको यातायात प्रभावित भएको छ।
विपद्का घटनालगत्तै उद्धार र राहतका लागि सुरक्षा निकायका २६७ जना दक्ष जनशक्ति कार्यक्षेत्रमा परिचालन गरिएको प्राधिकरणले जनाएको छ। शनिबार र आइतबार देशका धेरै स्थानमा भएको भारी र अति भारी वर्षाका कारण जलस्तर बढ्ने र जमिन थप कमजोर हुने जोखिमलाई मध्यनजर गर्दै प्राधिकरणले प्रतिकार्य संयन्त्रलाई उच्च सतर्कतामा राखेको छ।
