काठमाडौँ, ८ भदौ । सङ्घीय संसद् प्रतिनिधिसभाको बैठक आज बस्दैछ । नयाँ बानेश्वरस्थित संसद् भवनमा अपराह्न १ः०० बजेका लागि बैठक बोलाइएको सङ्घीय संसद् सचिवालयले जनाएको छ ।

आजको बैठकमा विशेषगरी मन्त्रालयगत प्रश्नोत्तर र विभिन्न महत्वपूर्ण विधेयकहरूलाई दफावार छलफलका लागि सम्बन्धित समितिमा पठाउने सम्भावित कार्यसूची रहेको छ ।

बैठकको प्रारम्भमा उद्योग, वाणिज्य तथा आपूर्ति मन्त्रालयसँग सम्बन्धित मौखिक प्रश्नहरूको सम्बन्धित मन्त्रीले उत्तर दिने कार्यक्रम छ । त्यसैगरी, प्रधानमन्त्री वालेन्द्र शाहको तर्फबाट अर्थमन्त्री डा. स्वर्णिम वाग्लेले ‘संवैधानिक निकायका पदाधिकारीको पारिश्रमिक, सेवाको शर्त र सुविधासम्बन्धी (पहिलो संशोधन) विधेयक, २०८३’ लाई दफावार छलफलका लागि सम्बन्धित समितिमा पठाइयोस् भन्ने प्रस्ताव प्रस्तुत गर्नुहुनेछ ।

सचिवालयका अनुसार आजको बैठकमा अन्य तीनवटा विधेयकलाई पनि समितिमा पठाउने तयारी छ :
१. परराष्ट्रमन्त्री शिशिर खनालले ‘राहदानी (पहिलो संशोधन) विधेयक, २०८३’ ।
२. महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षामन्त्री सीता बादीले ‘मानव बेचबिखन तथा ओसारपसार (नियन्त्रण) (पहिलो संशोधन) विधेयक, २०८३’ ।
३. उद्योग, वाणिज्य तथा आपूर्तिमन्त्री गौरी कुमारीले ‘खानी तथा खनिज पदार्थ विधेयक, २०८३’ ।
यी सबै विधेयकहरूलाई दफावार छलफलका लागि सम्बन्धित संसदीय समितिमा पठाउन प्रस्ताव गरिने कार्यसूची रहेको छ ।

सदनको बैठकसँगै आज विभिन्न पाँचवटा संसदीय समितिका बैठकहरू पनि तय भएका छन् । विवरणअनुसार अन्तर्राष्ट्रिय सम्बन्ध र पर्यटन समिति, कृषि तथा प्राकृतिक स्रोत समिति, पूर्वाधार विकास समिति, विधायन व्यवस्थापन समिति र सार्वजनिक नीति तथा प्रत्यायोजित विधायन समितिको बैठक बस्दैछ । यी समितिहरूमा आ-आफ्नो क्षेत्राधिकारभित्र पर्ने समसामयिक विषय र विधेयकहरूमाथि छलफल हुने जनाइएको छ ।