गोसाइँकुण्ड तीर्थयात्रामा गएका पालुङटारका ३१ यात्रु सम्पर्क विहीन
काठमाडौँ, भदौ १० । रसुवाको गोसाइँकुण्ड तीर्थयात्राका लागि गोरखाको पालुङटार नगरपालिकाबाट गएका ३१ जना यात्रु सम्पर्कविहीन भएका छन् । पालुङटार नगरपालिका ५, ठाँटीपोखरीबाट ग२ख ११५२ नम्बरको बसमा सवार ती यात्रुहरू आज बिहान भोटेकोशी नदीमा आएको भीषण बाढीपश्चात् सम्पर्कविहीन भएका हुन् ।
नगर उपप्रमुख बन्दना पाण्डेका अनुसार, पालुङटारबाट दुईवटा माइक्रो बस र एउटा ठूलो बसमा तीर्थयात्रीहरू गोसाइँकुण्डतर्फ प्रस्थान गरेका थिए । दुईवटा माइक्रो बसमा रहेका यात्रुहरू सुरक्षित रहेको जानकारी प्राप्त भए तापनि बसमा सवार ३७ जनामध्ये ३१ जनाको अवस्था अझै अज्ञात छ । बसका ६ जना यात्रुले भने हामफालेर ज्यान जोगाउन सफल भएको र उनीहरू अहिले सुरक्षित रहेको बताइएको छ ।
यस दुःखद घटनाका सम्बन्धमा गोरखाका प्रमुख जिल्ला अधिकारी तुलसी श्रेष्ठले प्रशासनका तर्फबाट खोजी र उद्धारका लागि पहल भइरहेको जानकारी दिनुभयो । “३७ जना सवार रहेको बसका ६ जना सुरक्षित रहेको र बाँकी ३१ जनाको अवस्था अज्ञात रहेको जानकारी आएको छ ।” प्रजिअ श्रेष्ठले भन्नुभयो, “हामीले गृह मन्त्रालय र नुवाकोट प्रशासनसँग निरन्तर समन्वय गरी खोजी कार्यलाई तीव्रता दिएका छौँ ।”
आज बिहान करिब ९:०० बजे तिब्बती क्षेत्रबाट भोटेकोशी नदीमा आएको आकस्मिक र भीषण बाढीले रसुवा, नुवाकोट, धादिङ, गोरखा र चितवनका तटीय क्षेत्रहरूमा ठूलो क्षति पुर्याएको छ । सम्पर्कविहीन भएकाहरूको पहिचान र खोजीका लागि स्थानीय प्रशासन तथा सुरक्षा निकायहरू परिचालन गरिएका छन् ।
