काठमाडौँ, असोज १८ ।  विभिन्न राजनीतिक दलका नेताहरूले नेपालको लोकतान्त्रिक व्यवस्था स्थापनाका लागि नेपाली कांग्रेसले महत्त्वपूर्ण र नेतृत्वदायी भूमिका निर्वाह गरेको बताउनुभएको छ । नेपाली कांग्रेसको १५औँ राष्ट्रिय महाधिवेशनको उद्घाटन सत्रमा आज शुभकामना मन्तव्य व्यक्त गर्दै श्रम संस्कृति पार्टीका महासचिव आरेन राईले लामो सङ्घर्ष, त्याग र बलिदानबाट कांग्रेस स्थापना भएको बताउनुभयो । उहाँले नेपालमा सङ्घीय लोकतान्त्रिक शासन व्यवस्था स्थापनाका लागि कांग्रेसले महत्वपूर्ण योगदान गरेको स्मरण गर्नुभयो ।

“कांग्रेसको इतिहास धेरै पढ्यौँ र हेर्यौँ, वास्तवमा यो हल्लाद्वारा स्थापित भएको पार्टी होइन,” महासचिव राईले भन्नुभयो। कांग्रेसको इतिहासमा धेरै नेता तथा कार्यकर्ताले व्यक्तिगत स्वार्थ र सपना त्यागेर राष्ट्र निर्माणमा योगदान गरेको उहाँको भनाइ थियो ।

महासचिव राईले कांग्रेसले आगामी दिनमा सत्तामा कति समय रहनेभन्दा पनि जनताको पक्षमा कति प्रभावकारी काम गर्न सकिन्छ भन्ने विषयलाई प्राथमिकता दिनुपर्ने बताउनुभयो ।

राष्ट्रिय उन्मुक्ति पार्टी नेपालका संस्थापक रेशमलाल चौधरीले राणाशासन र पञ्चायती व्यवस्थाको अन्त्य तथा वर्तमान संविधान निर्माणमा कांग्रेसले नेतृत्वदायी भूमिका निर्वाह गरेको बताउनुभयो । बदलिँदो राजनीतिक परिवेश र मुलुकको पछिल्लो घटनाक्रमलाई आत्मसात् गर्दै कांग्रेस अझ सशक्त र जिम्मेवार ढङ्गबाट अघि बढ्नुपर्ने उहाँको धारणा थियो। उहाँले महाधिवेशनको सफलताको शुभकामना दिनुभयो ।

राष्ट्रिय जनमोर्चाका कार्यवाहक महासचिव घनश्याम न्यौपानेले ऐतिहासिक स्थलमा कांग्रेसको १५औँ राष्ट्रिय महाधिवेशन आयोजना हुन लागेकोमा खुसी व्यक्त गर्दै मुलुकको समग्र भविष्यको दिशा निर्धारण गर्न महाधिवेशन सफल हुने विश्वास व्यक्त गर्नुभयो ।

विशिष्ट राजनीतिक घटनाक्रम र परिस्थितिका बीच आयोजना भइरहेको महाधिवेशनले कांग्रेसको आन्तरिक जीवनमा मात्र नभई मुलुकको लोकतान्त्रिक प्रणालीलाई थप सुदृढ बनाउनसमेत योगदान पुर्‍याउने विश्वास उहाँले व्यक्त गर्नुभयो ।