मुस्ताङ, २० असोजः भारी हिमपातका कारण अवरुद्ध अन्नपूर्ण चक्रीय पदमार्ग अन्तर्गतको थोरङला पासमा जमेको हिउँ पन्छ्याएपछि पदयात्राका लागि बाटो खुलेको छ।

मनाङ – मुस्ताङ जोड्ने थोरङला पासमा मुक्तिनाथ होटल एसोसिएसनको पहलमा २० जनाको टोलीले हिउँ पन्छ्याएपछि पदमार्ग पुनः सञ्चालनमा आएको हो । असोज ८ देखि ११ गतेसम्म भएको भारी हिमपातका कारण पदमार्ग पूर्णरूपमा अवरुद्ध भएपछि पर्यटकको आवागमन रोकिएको थियो ।

मुक्तिनाथ होटल एसोसिएसनका अध्यक्ष सुरज गुरुङले बाक्लो हिउँ पन्छ्याएर पदयात्राका लागि बाटो सहज बनाइएको जानकारी दिनुभयो। उहाँका अनुसार अहिले मनाङबाट थोरङला पास हुँदै मुस्ताङको मुक्तिनाथसम्म पदयात्रा गर्न कुनै समस्या छैन ।

लमजुङको बेँसीसहर हुँदै मनाङबाट थोरङला पास पार गरेर विदेशी पर्यटक मुक्तिनाथ आउने गर्छन्। विश्वप्रसिद्ध अन्नपूर्ण चक्रीय पदमार्गको महत्वपूर्ण खण्डका रूपमा रहेको थोरङला पास साहसिक पदयात्राका लागि पर्यटकको रोजाइमा पर्ने गरेको छ ।

अक्टोबरदेखि नोभेम्बरसम्म थोरङला पासमा साहसिक पदयात्राका लागि अनुकूल मौसम हुने भएकाले यस समयमा विदेशी पर्यटकको चाप बढ्ने गर्छ। अन्नपूर्ण चक्रीय पदमार्गमा मनाङ – मुस्ताङ खण्डमा वर्षमा करिब पाँच महिना मात्रै नियमित पर्यटकीय गतिविधि हुने गरेको एसोसिएसनले जनाएको छ ।

पदमार्ग खुलेसँगै आगामी पर्यटकीय मौसममा मनाङ हुँदै मुस्ताङ आउने पर्यटकलाई सहज हुने अपेक्षा गरिएको छ ।