काठमाडौं, २८ असोज । दसैँ, तिहार र छठलगायतका प्रमुख चाडपर्वलाई लक्षित गरी काठमाडौं उपत्यकामा ३ हजार ५०६ जना प्रहरी परिचालन गरिएको छ। चाडपर्वका बेला हुन सक्ने चोरी, लुटपाट, पाकेटमारी, ठगीलगायतका आपराधिक गतिविधि नियन्त्रण गरी नागरिकलाई सुरक्षित रूपमा चाडपर्व मनाउने वातावरण बनाउन प्रहरीले विशेष सुरक्षा योजना लागू गरेको हो।

जिल्ला प्रहरी परिसर काठमाडौंका अनुसार बजार, सार्वजनिकस्थल, यातायात केन्द्र तथा सर्वसाधारणको बढी आवतजावत हुने क्षेत्रमा सुरक्षा निगरानी बढाइएको छ। चाडपर्व मनाउन घरबाहिर निस्कने, किनमेलका लागि बजार जाने र विभिन्न स्थानमा यात्रा गर्ने नागरिकको सुरक्षालाई प्राथमिकतामा राखेर प्रहरी परिचालन गरिएको परिसरका प्रवक्ता एवं प्रहरी उपरीक्षक दानबहादुर थापाले जानकारी दिए।

उनका अनुसार चाडपर्व लक्षित सुरक्षा व्यवस्थाअन्तर्गत परिचालन गरिएका प्रहरीमध्ये १०० जना सादा पोसाकमा खटिएका छन्। उनीहरूले भीडभाड हुने सार्वजनिकस्थलमा निगरानी गर्ने, शङ्कास्पद गतिविधि पहिचान गर्ने र सम्भावित आपराधिक क्रियाकलाप नियन्त्रणमा सहयोग गर्नेछन्।

प्रहरीले नियमित गस्ती र जनशक्ति परिचालनसँगै सुरक्षा निगरानीमा प्रविधिको प्रयोगलाई पनि प्राथमिकता दिएको छ। सामुदायिक सेवा केन्द्र, ड्रोन क्यामेरा, सामाजिक सञ्जाल तथा तालिमप्राप्त कुकुरको प्रयोग गरी सुरक्षा व्यवस्था प्रभावकारी बनाउने तयारी गरिएको परिसरले जनाएको छ।

प्रहरी उपरीक्षक थापाका अनुसार प्रविधि र जनशक्तिबीच समन्वय गरेर शङ्कास्पद गतिविधिको पहिचान तथा सुरक्षा व्यवस्थापनलाई थप प्रभावकारी बनाइनेछ।

चाडपर्वका बेला सर्वसाधारणको चहलपहल बढ्ने सार्वजनिकस्थल, बसपार्क, वित्तीय संस्था तथा तिनका आसपासका क्षेत्र, सरकारी कार्यालय र चाडपर्व लक्षित बजारलाई विशेष निगरानीमा राखिएको छ। ती क्षेत्रमा नियमित प्रहरीसँगै सादा पोसाकका प्रहरीसमेत परिचालन गरिएको छ।

दसैँ तथा तिहारमा किनमेल गर्ने, घर फर्किने र आफन्तकहाँ जानेको सङ्ख्या बढ्ने भएकाले बजार तथा यातायात केन्द्रमा चोरी, पाकेटमारी, ठगीलगायतका गतिविधि हुन सक्ने प्रहरीको आकलन छ। त्यस्ता गतिविधि रोक्न प्रहरी टोलीलाई सक्रिय बनाइएको छ।

आर्थिक कारोबार हुने क्षेत्रको सुरक्षामा पनि विशेष ध्यान दिइएको प्रहरीले जनाएको छ। चाडपर्वका बेला सर्वसाधारणले किनमेल तथा अन्य प्रयोजनका लागि रकम बोकेर हिँड्ने भएकाले सम्भावित आपराधिक गतिविधि नियन्त्रण गर्न निगरानी बढाइएको हो।

चाडपर्वको सुरक्षा व्यवस्थालाई व्यवस्थित बनाउन काठमाडौं उपत्यकाका १४ वटा सेक्टरलाई लक्षित गरी विशेष सुरक्षा योजना लागू गरिएको प्रहरी उपरीक्षक थापाले बताए।

उनका अनुसार प्रत्येक सेक्टरमा सम्बन्धित प्रहरी वृत्तका प्रमुखलाई परिचालन गरी सुरक्षा व्यवस्थाको प्रत्यक्ष निगरानी गर्ने व्यवस्था मिलाइएको छ। जिल्ला प्रहरी परिसरका प्रमुख तथा वरिष्ठ प्रहरी अधिकृतसमेत सुरक्षा योजनाको कार्यान्वयन र अनुगमनमा संलग्न हुनेछन्।

“हामीले उपत्यकाका १४ वटा सेक्टरलाई लक्षित गरी सुरक्षा योजना लागू गरेका छौँ। ती सेक्टरमा प्रहरी वृत्त प्रमुख खटिनेछन् भने त्यसको निगरानी परिसरले गर्नेछ। परिसर प्रमुख र सिनियर अधिकृत पनि उक्त सुरक्षा योजनाअनुसार खटिनुहुनेछ,” थापाले भने।

सेक्टरगत जिम्मेवारीले सम्बन्धित क्षेत्रमा प्रहरीको उपस्थिति प्रभावकारी बनाउन तथा घटनाको सूचना प्राप्त हुनासाथ तत्काल प्रहरी टोली परिचालन गर्न सहज हुने प्रहरीको भनाइ छ।

सुरक्षा योजनाअन्तर्गत नियमित गस्ती, शङ्कास्पद गतिविधिको निगरानी, प्रहरी जनशक्तिको परिचालन र आवश्यकताअनुसार तत्काल टोली खटाउने व्यवस्थालाई प्राथमिकता दिइएको छ।

दसैँ, तिहार र छठका अवसरमा बजारमा किनमेल गर्नेको चाप, सार्वजनिक यातायातमा यात्रुको आवागमन तथा धार्मिक र सांस्कृतिक गतिविधि बढ्ने भएकाले सुरक्षा व्यवस्था चुस्त बनाइएको प्रहरीले जनाएको छ।

प्रहरीले जनशक्ति परिचालनसँगै प्रविधिको प्रयोग र विभिन्न निकायसँगको समन्वयलाई पनि प्राथमिकता दिएको छ। सादा पोसाकका प्रहरी, ड्रोन क्यामेरा तथा तालिमप्राप्त कुकुरको प्रयोगबाट सुरक्षा निगरानीलाई थप प्रभावकारी बनाउने अपेक्षा गरिएको छ।

यसैबीच, प्रहरीले चाडपर्वका बेला आफ्नो घर तथा सम्पत्तिको सुरक्षामा ध्यान दिन, अपरिचित व्यक्तिको गतिविधिप्रति सचेत रहन र शङ्कास्पद गतिविधि देखिएमा नजिकको प्रहरी कार्यालयमा जानकारी गराउन सर्वसाधारणलाई आग्रह गरेको छ।

चाडपर्वका समयमा सम्भावित आपराधिक गतिविधि नियन्त्रण गरी नागरिकलाई ढुक्कसँग पर्व मनाउने वातावरण सिर्जना गर्नु सुरक्षा योजनाको मुख्य उद्देश्य रहेको प्रहरीले जनाएको छ।