खेलकुद प्रवर्धनका लागि महानगरको सक्रियता : तीन विधाका ठूला प्रतियोगिता सञ्चालन गर्न संघहरूसँग सम्झौता
काठमाडौँ, जेठ १३ । काठमाडौँ महानगरपालिकाले स्थानीय स्तरमा खेलकुदको विकास गरी राष्ट्रिय तथा अन्तर्राष्ट्रिय स्तरका खेलाडी उत्पादन गर्ने लक्ष्यका साथ तीन ठूला प्रतियोगिता सञ्चालन गर्ने भएको छ । महानगरपालिकाले क्रिकेट, ब्याडमिन्टन र पौडी प्रतियोगिता आयोजनाका लागि सम्बन्धित विधागत सङ्घहरूसँग औपचारिक सम्झौता गरेको हो ।
काठमाडौँ प्लाजामा बिहीबार आयोजित एक कार्यक्रममा महानगरपालिकाकी कार्यवाहक प्रमुख सुनिता डंगोल, प्रमुख प्रशासकीय अधिकृत सरोज गुरागाईँ र सामाजिक समितिका संयोजक रामकुमार केसीको उपस्थितिमा सम्झौता पत्रमा हस्ताक्षर गरिएको छ ।
कुन खेलका लागि कति लगानी
सम्झौता अनुसार महानगरपालिकाले तीनवटा प्रतियोगिताका लागि कुल १ करोड १५ लाख रुपियाँ अनुदान उपलब्ध गराउनेछ ।
क्रिकेट (पिएल सिंह टी-ट्वान्टी क्रिकेट कप) : बागमती प्रदेश क्रिकेट सङ्घसँगको सहकार्यमा हुने यस प्रतियोगिताका लागि महानगरले ७५ लाख रुपियाँ उपलब्ध गराउनेछ । यसमा काठमाडौँ, ललितपुर, पोखरा, भरतपुर, विराटनगर र वीरगञ्ज गरी ६ वटा महानगरका टोलीहरू सहभागी हुनेछन् ।
ब्याडमिन्टन (काठमाडौँ महानगर कप वडास्तरीय) : काठमाडौँ जिल्ला ब्याडमिन्टन सङ्घसँगको सम्झौता अनुसार महानगरले ३० लाख रुपियाँ लगानी गर्नेछ । यो वडास्तरीय प्रतियोगिता हुनेछ ।
पौडी (मेयर कप पौडी प्रतियोगिता) : नेपाल पौडी सङ्घसँगको सहकार्यमा १० लाख रुपियाँको लागतमा राष्ट्रिय स्तरको खुला प्रतियोगिता आयोजना गरिनेछ, जसमा ओलम्पियन र राष्ट्रिय खेलाडीहरूको प्रतिस्पर्धा हुनेछ ।
सम्झौता अनुसार सम्बन्धित सङ्घहरूले कुल लागतको २० प्रतिशत हिस्सा व्यहोर्नु पर्ने प्रावधान राखिएको छ ।
प्रतियोगिताको समयतालिका
सम्झौता बमोजिम पौडी प्रतियोगिता आगामी जेठ २३ र २४ गते अन्तर्राष्ट्रिय पौडी पोखरीमा सञ्चालन हुनेछ । यस्तै, ब्याडमिन्टन प्रतियोगिता असार २ गतेभित्र र क्रिकेट प्रतियोगिता असार ५ गतेभित्र सम्पन्न गरिसक्नुपर्ने समयसीमा तोकिएको छ ।
नेतृत्वको भनाइ
सम्झौतापछि संक्षिप्त प्रतिक्रिया दिँदै कार्यवाहक प्रमुख सुनिता डंगोलले स्थानीय स्तरमा खेलकुदको जग बलियो बनाउँदै प्रतिभावान खेलाडी उत्पादन गर्न महानगरले लगानी बढाएको बताउनुभयो । “हामी विज्ञ र खेलाडीहरूसँगै बसेर खेल विकासको योजना बनाइरहेका छौँ, यसले खेल क्षेत्रमा नयाँ उर्जा थप्नेछ,” उहाँले भन्नुभयो ।
सामाजिक समितिका संयोजक रामकुमार केसीले खेल पूर्वाधार र खेलाडी प्रोत्साहनका लागि सहकार्य र लगानीलाई निरन्तरता दिइने प्रतिबद्धता व्यक्त गर्नुभयो । सङ्घका प्रतिनिधिहरूले महानगरको यस सहयोगले खेल क्षेत्रको विकासमा कोसेढुङ्गा सावित हुने विश्वास व्यक्त गरेका छन् ।
यी प्रतियोगिताहरू सञ्चालन गर्ने निर्णय जेठ ३ गते बसेको महानगरको कार्यपालिका बैठकले गरेको थियो । महानगर र खेल सङ्घहरूको संयुक्त ब्यानरमा आयोजना हुने यी खेलहरूले काठमाडौँको खेलकुद पर्यटन र खेलाडीको व्यावसायिकतामा उल्लेख्य सहयोग पुग्ने अपेक्षा गरिएको छ ।
