रुद्रमतीमा खसेको ट्याक्सी सशस्त्र प्रहरीले यूएन पार्कअगाडि भेट्टायाे

काठमाडौं, ३१ भदौ । काठमाडाैंकाे हनुमानथान र थापागाउँ जोड्ने पुल नजिकबाट धोबीखोलाले बगाएकाे बा २ ज १७९२ नम्बरको ट्याक्सी आज यूएन पार्कअगाडि फेला परेको छ ।

आइतबार बेलुकी परेकाे भारी वर्षाकाे भेलले राति करिब साढे ८ बजेको समयमा बगाएर ट्याक्सी रुद्रमतीमा खसेको हाे ।

खोलाले बगाएको ट्याक्सी थापाथलीस्थित वाग्मती नदी र धोवीखोलाको दोभानमा केही भाग देखिएकाे थियाे ।

ट्याक्सीलाई दोभानबाट बाहिर निकाल्ने प्रयास भइरहेपनि असफल भएपछि भेलले बगाएर वागमतीमा पुर्याएकाे थियाे ।

सशस्त्र प्रहरी बल नेपाल नं. २० विपद् उद्धार गणबाट गोताखोरसहित खटिएको ११ जनाको टोलीले आज बिहान काठमाडौं महानगरपालिका-११, थापाथलीस्थित यूएन पार्कअगाडि उक्त ट्याक्सी फेला पारेको हो ।

तस्बिर : राज महर्जन