पोखरामा प्रादेशिक ललितकला प्रदर्शनी सुरु
कास्की,५ फागुन । नेपालको पर्यटकीय राजधानी पाेखरामा दोस्रो प्रादेशिक ललितकला प्रदर्शनी आइतबारदेखि सुरु भएको छ। यो प्रदर्शनी नेपाल ललितकला प्रज्ञा प्रतिष्ठान, गण्डकी प्रज्ञा प्रतिष्ठान, र ‘काठमाडौँ ट्रिएनाले’द्वारा आयोजना गरिएको हो र यो पाँच दिनसम्म जारी रहनेछ।
गण्डकी प्रज्ञा प्रतिष्ठानका कुलपति सूर्य खड्का ‘बिखर्ची’का अनुसार, नयाँ बजारमा रहेको पोखरा आर्ट ग्यालरीमा सुरु भएको प्रदर्शनीमा ८० वटा कलाकृतिहरू प्रदर्शनमा राखिएका छन्। उनले थप जानकारी दिए कि गण्डकी प्रदेश स्तरमा उत्कृष्ट ठहरिएका कलाकारहरूलाई काठमाडौंमा आयोजना हुने राष्ट्रिय ललितकला प्रदर्शनीमा सहभागी गराइनेछ। प्रदर्शनीमा नवोदितदेखि स्थापित कलाकारहरूसम्मका कलाकृतिहरू समावेश छन्।
सिर्जनशील कलाकार समूह, कास्कीको सहकार्यमा सञ्चालित यस प्रदर्शनी बिहान १० बजेदेखि साँझ ५ बजेसम्म अवलोकनका लागि खुला रहनेछ। समूहका अध्यक्ष डिबी गुरुङले जानकारी दिए अनुसार गत वर्षदेखि प्रदेश स्तरमा ललितकला प्रदर्शनीको आयोजना सुरु भएको हो।
नेपाल ललितकला प्रतिष्ठानका अनुसार सातै प्रदेशबाट छानिएका कलाकृतिहरू राष्ट्रिय ललितकला प्रदर्शनीमा राखिनेछन्। प्रादेशिक ललितकला प्रदर्शनीमा सबै विधाबाट उत्कृष्ट हुने एक जनालाई रु. ५० हजारको पुरस्कार प्रदान गरिने भएको छ।
पुरस्कारको संरचनामा चित्रकलातर्फ परम्परागत र समसामयिक चित्रकला, मूर्तिकलातर्फ परम्परागत लोक मूर्तिकला र समसामयिक आधुनिक मूर्तिकला, शिल्पकला–हस्तकला, र विद्यार्थी ललितकला प्रादेशिक पुरस्कारहरू समावेश छन्, जसमा प्रत्येक विधामा एकजनालाई पुरस्कृत गरिनेछ। यसका साथै लोककला, वास्तुकला र अन्य सिर्जनात्मक कलातर्फ दुई जनालाई पुरस्कृत गरिने प्रतिष्ठानले जनाएको छ। विधागत पुरस्कारको राशि रु. ३० हजार तोकिएको छ।
राष्ट्रिय प्रदर्शनीमा सहभागी भई सर्वोत्कृष्ट हुने कलाकारले रु. एक लाख र विधागत रूपमा उत्कृष्ट हुने कलाकारले रु. ६० हजार प्राप्त गर्नेछन्। प्रदर्शनीको अवलोकन गर्दै गण्डकी प्रदेशका सामाजिक विकास, युवा तथा खेलकुदमन्त्री विन्दुकुमार थापाले पोखरा आर्ट ग्यालरीलाई व्यवस्थित र सुविधासम्पन्न बनाउन प्रदेश सरकारले पहल गर्ने बताए। उनले ललितकलाको विकासका लागि यस प्रदर्शनीले टेवा पुर्याउने विश्वास व्यक्त गरे।
प्रदर्शनीको उद्घाटन समारोहमा ललितकला प्रज्ञा प्रतिष्ठानका कुलपति नारदमणि हार्तम्छाली, गण्डकी प्रज्ञा प्रतिष्ठानका कुलपति सूर्य खड्का ‘बिखर्ची’, उपकुलपति गोरे गुरुङलगायत कला क्षेत्रका विशिष्ट व्यक्तित्वहरूको उपस्थिति रहेको थियो।
