क्यानडाका प्रधानमन्त्री कार्नी, अमेरिकासँग पुनः वार्ता सुरु गर्न इच्छुक

काठमाडौँ, कार्तिक १० । क्यानाडाका प्रधानमन्त्री मार्क कार्नीले सोमबार अमेरिकी राष्ट्रपति डोनाल्ड ट्रम्पसँग वार्ता गर्न तयार रहेको बताउनुभएको छ । क्यानडासँगको व्यापार वार्ता केबल भ्रामक विज्ञापन अभियान बनेको भन्दै राष्ट्रपति ट्रम्पले क्यानडासँगको सबै वार्ता रद्द गरेको बताएपछि कार्नीले पत्रकारहरूसँग भन्नुभयो, “जब अमेरिका वार्तामा बस्न तयार हुन्छ, हामी अमेरिकासँग बस्न तयार छौँ, हामी राष्ट्रपति ट्रम्प र अमेरिकी प्रतिनिधिसँग वार्तामा बस्न तयार छौँ ।”

राष्ट्रपति ट्रम्पसमेत सहभागी रहेको मलेसियामा आयोजना गरिएको क्षेत्रीय शिखर सम्मेलनका क्रममा कार्नीले यस्तो बताउनुभएको हो । कार्नीले क्वालालम्पुरमा अमेरिकी राष्ट्रपतिसँग आफ्नो कुनै सम्पर्क नभएको बताउनुभयो । प्रधानमन्त्री कार्नीले बुधबार दक्षिण कोरियामा हुने एसिया प्यासिफिक इकोनोमिक कोअपरेसन (एपेक) शिखर सम्मेलनमा चिनियाँ राष्ट्रपति सी जिनपिङसँग भेट्ने तयारी भएको बताउनुभयो। कार्नीले सीसँगको वार्तामा ‘व्यापारिक सम्बन्धका साथै विश्व प्रणालीको विकास’ का बिषयमा छलफल गरिने बताउनुभयो ।

कार्नीसँग केही समय नभेट्ने ट्रम्पको भनाइ

यसैबीच, अमेरिकी राष्ट्रपतिले कार्नीसँग भेट्ने आफ्नो कुनै योजना नभएको बताउनुभएको छ । ट्रम्पको विश्वव्यापी क्षेत्रगत करवृद्धिले विशेष गरी स्टिल, एल्युमिनियम र अटोमोबाइलहरूमा क्यानाडालाई नराम्ररी असर गरेको छ। कर वृद्धिका कारण रोजगारी गुम्ने व्यवसायहरू धराशायी बन्ने अवस्था सिर्जना भएको छ । स्टिल, आल्मुनियम र ऊर्जासँग सम्बन्धित क्षेत्रमा उल्लेखनीय प्रगति भएको अमेरिकी व्यापार वार्तातर्फ सङ्केत गर्दै कार्नीले भन्नुभयो, “हामीले व्यापार सम्बन्धमा उल्लेखनीय प्रगति गरेका छौँ ।”

अमेरिकी राष्ट्रपति रोनाल्ड रेगनले आयातमा उच्च करले अमेरिकी अर्थतन्त्रमा पार्न सक्ने असरबारे चेतावनी दिनुभएको सन् १९८७ को व्यापारसम्बन्धी रेडियो सम्बोधनका उद्धरणहरू प्रयोग गरिएको छ । यसमा रिपब्लिकन आइकनलाई उद्धृत गर्दै भनिएको छ, “उच्च करले अनिवार्य रूपमा विदेशी देशहरूको प्रतिशोध निम्त्याउँछ र भयङ्कर व्यापार युद्धहरू निम्त्याउँछ ।” उद्धरण रोनाल्ड रेगन प्रेसिडेन्सियल लाइब्रेरीको वेबसाइटमा उहाँको भाषणको ट्रान्सक्रिप्टसँग मेल खान्छ ।

रोनाल्ड रेगन फाउन्डेसनले बिहीबार एक्समा लेखेको छ कि ओन्टारियो सरकारले ‘चयनात्मक अडियो र भिडियो’ प्रयोग गरेको छ र यसले आफ्नो कानुनी विकल्पहरूको समीक्षा गरिरहेको छ । ओन्टारियोले भनेको छ, “उसले सोमबार अपमानजनक करविरोधी विज्ञापन हटाउनेछ ताकि वार्ता पुनः सुरु गर्न सकियोस् ।”

राष्ट्रपति ट्रम्पले क्यानडाका सामानमा थप १० प्रतिशत करवृद्धि गर्ने घोषणा गर्नुभएको छ र पूर्व राष्ट्रपति रोनाल्ड रेगनको करवृद्धि विरोधी ‘भ्रामक विज्ञापन’ अभियानपछि सबै व्यापार वार्ता रद्द गरेको घोषणा गर्नुभएको छ । एसिया-प्रशान्त आर्थिक सहयोग (एपेक) शिखर सम्मेलनमा कार्नीसँग भेट्ने सन्दर्भमा के हुन्छ भनी सोधिएको प्रश्नमा उहाँले एयर फोर्स वानमा पत्रकारहरूसँग भन्नुभयो, “म उहाँसँग भेट्न चाहन्न, होइन । म उहाँसँग केही समयको लागि भेट्ने छैन । व्यवहार गर्न सबैभन्दा कठिन देशहरू मध्ये एक क्यानाडा हो । म क्यानाडा र क्यानाडाका मानिसहरूलाई माया गर्छु ।”

ट्रम्पले करवृद्धि कहिले सुरु हुन्छ भन्ने पुष्टि भने गर्नुभएको छैन ।