२५७०औँ बुद्ध जयन्ती आज : विश्वभर शान्तिको सन्देश फैलाइँदै, यस्तो छ बुद्धको महिमा

काठमाडौँ, १८ वैशाख । वैशाख शुक्ल पूर्णिमा अर्थात् शान्तिका अग्रदूत भगवान् गौतम बुद्धको जन्म, ज्ञान प्राप्ति र महापरिनिर्वाण भएको त्रिसंयोग परेको दिन । आज नेपाललगायत विश्वभर बुद्धका अनुयायीहरूले २५७०औँ बुद्ध जयन्ती विभिन्न कार्यक्रम गरी श्रद्धा र भक्तिपूर्वक मनाउँदै छन् ।

इसापूर्व ५६३ अर्थात् आजभन्दा २५७० वर्षअघि रुपन्देहीको लुम्बिनी उद्यानमा पिता राजा शुद्धोधन र माता मायादेवीको कोखबाट वैशाख शुक्ल पूर्णिमाकै दिन सिद्धार्थ गौतमको जन्म भएको थियो । रोचक कुरा त के छ भने, बुद्धले बुद्धत्व (ज्ञान) प्राप्त गरेको र ८० वर्षको उमेरमा कुशीनगरमा महापरिनिर्वाण (मृत्यु) प्राप्त गरेको तिथि पनि वैशाख शुक्ल पूर्णिमा नै हो । त्यसैले यस दिनलाई बौद्ध धर्मावलम्बीहरूले विशेष पर्वका रूपमा लिने गर्दछन् ।

“अहिंसा नै शान्ति र मैत्रीको आधारशिला हो” भन्ने बुद्धका कालजयी उपदेशहरू आजको युद्धग्रस्त विश्वमा झनै सान्दर्भिक बनेका छन् । सिद्धार्थ गौतमले मानिसले पाएका दुःख र कष्ट देखेर त्यसको निवारण खोज्न २९ वर्षको उमेरमा गृहत्याग गर्नुभएको थियो । ६ वर्षको कठोर तपस्यापछि उहाँले बोधगयामा ज्ञान प्राप्त गर्नुभयो र बुद्धका रूपमा विश्वप्रसिद्ध हुनुभयो । हिन्दू धर्मावलम्बीहरूले पनि बुद्धलाई भगवान् विष्णुको नवौँ अवतारका रूपमा पूजा गर्ने गर्दछन् ।

बुद्ध जयन्तीका अवसरमा आज काठमाडौँका स्वयम्भू, बौद्ध, तथा बुद्धको जन्मस्थल लुम्बिनीमा बिहानैदेखि भक्तजनको घुइँचो लागेको छ । चैत्य, गुम्बा र विहारहरूमा लामा एवं बौद्ध धर्मगुरुहरूले विशेष पूजा, आराधना र प्रवचन गरिरहेका छन् । लुम्बिनीमा सरकारले विशेष समारोह आयोजना गरेको छ भने काठमाडौँका विभिन्न स्थानमा शान्ति पदयात्रा समेत निकालिएका छन् ।

बुद्ध जयन्तीले नेपाली समाजमा धार्मिक सहिष्णुता, भ्रातृत्व र आपसी मेलमिलापको भावनालाई अझ मजबुत बनाउने विश्वास गरिएको छ ।