दैलेख फोर्स गाडी दुर्घटना अपडेट: कर्णाली नदीमा थप दुई शव भेटिए, तीन मृतकको पहिचान खुल्यो

दैलेख, २६ असार । कर्णाली राजमार्गअन्तर्गत दैलेखको चामुण्डाबिन्द्रासैनी नगरपालिका–७, साङ्गेतरामा भएको फोर्स गाडी दुर्घटनामा बेपत्ता भएकामध्ये थप दुई जनाको शव फेला परेको छ। बिहीबार साँझ नदी किनारमा शव भेटिएसँगै यस दुर्घटनामा मृत्यु भई सनाखत हुनेको सङ्ख्या तीन पुगेको छ।

जिल्ला प्रहरी कार्यालय दैलेखका प्रमुख एवं प्रहरी नायब उपरीक्षक श्रवणकुमार विकका अनुसार फेला परेका शवहरूको आफन्तद्वारा सनाखत भइसकेको छ। पहिचान खुल्ने मृतकहरूमा:
१. जेखे तिरुवा: पचाल झरना गाउँपालिका–९, कालिकोट (यसअघि भिरमा शव फेला परेका)।
२. मेखे तिरुवा: पचाल झरना गाउँपालिका–९, कालिकोट (बेपत्ताको सूचीमा रहेका)।
३. सुजना खड्का (१८ वर्षीया): रास्कोट नगरपालिका–२, कालिकोट।
प्रहरीका अनुसार कानूनी प्रक्रिया पूरा गरी शवहरू आफन्तको जिम्मा लगाइएको छ।

दुर्घटनामा परेका सवारी चालक सुर्खेत पञ्चपुरी नगरपालिका–८ का तुलाराम सुवेदी र उनका सहोदर भाइ (सहचालक) रामु सुवेदी अझै बेपत्ता छन्। घरका मुख्य आर्थिक आधार रहेका दुवै दाजुभाइ नदीमा बेपत्ता भएपछि सुवेदी परिवार र सिङ्गो गाउँ शोकमा डुबेको छ। उनीहरूसँगै अन्य केही यात्रुको अवस्था समेत अझै अज्ञात रहेको प्रहरीले जनाएको छ।

गत बिहीबार सुर्खेतबाट कालीकोटतर्फ जाँदै गरेको क.प्र. ०२–००१ ख १०५५ नम्बरको फोर्स गाडी अनियन्त्रित भई सडकबाट करिब ४०० मिटर तल कर्णाली नदीमा खसेको थियो। भौगोलिक विकटता र नदीको तीव्र बहावका कारण उद्धार र खोजी कार्य चुनौतीपूर्ण बनेको छ।
हाल सशस्त्र प्रहरी बलको गोताखोर टोलीसहित नेपाल प्रहरी र नेपाली सेनाको संयुक्त टोलीले नदीको गहिराइ र आसपासका क्षेत्रमा बेपत्ताहरूको सघन खोजी गरिरहेको छ।