सांसदका स्वकीयको पारिश्रमिक र भ्रमण भत्ता बढाउन सरकार सकारात्मक

काठमाडौँ, १ साउन । अर्थमन्त्री डा. स्वर्णिम वाग्लेले सङ्घीय संसद्का सदस्यहरूका स्वकीय सचिवहरूको पारिश्रमिक वृद्धि र फिल्ड भ्रमण भत्तालाई समयसापेक्ष बनाउने विषयमा सरकार सकारात्मक रहेको बताउनुभएको छ। शुक्रबार प्रतिनिधिसभाअन्तर्गतको अर्थ समितिको बैठकमा बोल्दै मन्त्री वाग्लेले संसदीय कार्यसम्पादनलाई प्रभावकारी बनाउन जनशक्ति र उनीहरूको सुविधामा पुनरावलोकन गर्न सरकार तयार रहेको सङ्केत गर्नुभएको हो।

मन्त्री वाग्लेले सांसदहरूलाई दिइने सेवा–सुविधा र उनीहरूको सचिवालयमा कार्यरत कर्मचारीहरूको पारिश्रमिकका विषयमा सरकार ‘उदार’ रहने नीति लिएको स्पष्ट पार्नुभयो। “तलब वृद्धिको विषय र स्वकीय सचिवहरूको सुविधाका सन्दर्भमा हामी सकारात्मक छौँ,” उहाँले भन्नुभयो, “विशेष गरी फिल्ड भ्रमणका क्रममा उपलब्ध गराइने भत्ता र अन्य सुविधाहरूलाई आवश्यक विधि र प्रक्रिया पुरा गरी समयानुकूल बनाउन सरकारले गृहकार्य गर्नेछ।”

हालै मात्र सरकारले सांसदहरूका लागि अधिकृत स्तरको स्वकीय सचिव राख्ने सुविधा पुनः कायम गरेको पृष्ठभूमिमा अर्थमन्त्रीको यो भनाइ आएको हो। यसले राज्यकोषमा थप प्रशासनिक व्ययभार थपिने भए तापनि यसलाई ‘संसदीय दक्षता’ सँग जोडेर हेरिएको छ।

बैठकमा अर्थमन्त्रीले ‘नेपाल राष्ट्र बैंक (तेस्रो संशोधन) विधेयक, २०८३’ माथि भइरहेको चर्चाबारे समेत आफ्नो धारणा राख्नुभयो। उहाँले केन्द्रीय बैंकको स्वायत्तता र कार्यकुशलतालाई ध्यानमा राख्दै प्रस्तावित संशोधनका विषयहरूलाई स्वस्थ र विधिसम्मत छलफलमार्फत टुङ्ग्याउन सरकार तयार रहेको बताउनुभयो।

विशेष गरी राष्ट्र बैंकको सञ्चालक समितिको आकार र सदस्य सङ्ख्याका विषयमा उठेका प्रश्नहरूबारे टिप्पणी गर्दै मन्त्री वाग्लेले भन्नुभयो, “सञ्चालक समितिमा सदस्य सङ्ख्या कति राख्ने र त्यसको संरचना कस्तो हुने भन्नेमा हामी खुला छलफल गर्न तयार छौँ। नीतिगत स्थिरता र वित्तीय सुशासन नै हाम्रो मुख्य प्राथमिकता हो।”