ओमानलाई ८७ रनले पराजित गर्दै फाइनलमा नेपाल, अब युएईसँग उपाधिको भिडन्त

काठमाडौं, २५ भदौ । नेपाल एसीसी प्रिमियर कप एकदिवसीय क्रिकेटको फाइनलमा प्रवेश गरेको छ। सेमिफाइनलमा नेपालले ओमानलाई ८७ रनको ठूलो अन्तरले पराजित गर्दै फाइनलमा स्थान सुनिश्चित गरेको हो।

नेपालले दिएको १४८ रनको लक्ष्य पछ्याउन उत्रिएको ओमान १८.१ ओभरमै ६० रनमा अलआउट भयो। ओमानका लागि जतिन्दर सिंहले २५ र जितेन रमानन्दीले १३ रन बनाउनुबाहेक अन्य कुनै पनि ब्याट्सम्यान दोहोरो अंकसम्म पुग्न सकेनन्। ओमानलाई सस्तैमा ढाल्न सन्दीप लामिछाने र दीपेन्द्रसिंह ऐरीले तीन–तीन तथा ललित राजवंशी र रोहित पौडेलले दुई–दुई विकेट लिए।

यसअघि मलेसियाको क्वालालम्पुरस्थित बायुमास ओभल मैदानमा टस हारेर पहिले ब्याटिङमा उत्रिएको नेपाल ४५.४ ओभरमा जम्मा १४७ रनमै अलआउट भएको थियो। दीपेन्द्रसिंह ऐरीले ५१ र बसिर अहमदले ४७ रनको योगदान दिए, तर अन्य ब्याट्सम्यान भने खासै चल्न सकेनन्। ओपनर जोडी देव खनाल (१३) र आसिफ शेख (११) ले सामान्य सुरुआत गराएका थिए भने ईशान पाण्डेले १, रोहित पौडेलले ३, गुलशन झाले ७, करण केसीले ५ र कप्तान सन्दीप लामिछानेले ३ रन बनाए।

ओमानको बलिङतर्फ जय विरम ओडेडारा र हस्नइन शाहले तीन–तीन विकेट र मुहम्मद इमरानले दुई विकेट लिएका थिए भने मुजीबुर अलि र शकिल अहमदले एक–एक विकेट लिएका थिए।

यस जीतसँगै नेपालले अब उपाधिका लागि युएईसँग भिड्नेछ। युएईले हङकङमाथि सहज जीत हासिल गर्दै पहिल्यै फाइनलमा स्थान बनाइसकेको छ। फाइनल खेल आगामी शनिबार हुनेछ, जसमा उपाधि जित्ने टोलीले सन् २०२७ मा बंगलादेशमा हुने एसिया कपमा स्थान पाउनेछ।