तेल अभिभ। इजरायलको तेल अभिभमा शनिबार हजारौं मानिसले र्‍याली निकाली प्रधानमन्त्री बेन्जामिन नेतन्याहुलाई सत्ताबाट हटाउन विपक्षी दलहरूले अरब दलहरूसँग सहमति गर्नुपर्ने माग गरेका छन्।

र्‍यालीमा सहभागीहरूले एएफपी समाचार संस्थासँग कुरा गर्दै यो “वास्तविक परिवर्तनको अन्तिम अवसर” हुन सक्ने बताए। उनीहरूले इजरायलको सबैभन्दा लामो समय शासन गरेका प्रधानमन्त्री नेतन्याहुलाई “ठूलो जोडतोड गर्ने खेलाडी” भनी आरोप लगाए।

प्रमुख विपक्षी नेता गाडी आइजेनकोटले यसअघि इजरायलका अरब दलहरूसँग गठबन्धन नबनाउने बताएका थिए। तर मंगलबारको निर्वाचनपछि गतिरोध उत्पन्न भएकाले ती दलको साथ लिँदा उनका लागि सरकार गठन गर्न सहज हुन सक्छ।

अल जजिराकी संवाददाता नूर ओदेहले रामल्लाहबाट दिएको जानकारीअनुसार, “जनताले परिवर्तनका लागि भएको यो मतले परिणाम देओस् भन्ने चाहन्छन्। उनीहरूको विश्वास छ कि गाडी आइजेनकोट र अन्य यहुदी–इजरायली दलका नेताहरूले जनताको आवाज सुन्नुपर्छ।”

प्रतिप्रदर्शन पनि

शनिबारको प्रदर्शनमा नेतन्याहुका समर्थकहरू पनि प्रतिप्रदर्शन गर्न आइपुगेका थिए। उनीहरूले “तथाकथित आतंककारीहरूसँग मिलेर इजरायलमा सरकार बन्नु हुँदैन” भन्ने नारा लगाएको ओदेहले बताइन्।

निर्वाचन परिणाम

मंगलबारको निर्वाचनमा नेतन्याहु नेतृत्वको गठबन्धनले ५३ सिट जित्यो भने आइजेनकोटको गठबन्धनले ४८ सिट पायो। १२० सदस्यीय संसद्मा कुनै पनि पक्षले एक्लै सरकार बनाउन सक्ने अवस्था छैन।

तीनवटा अरब नेतृत्वका दलले १९ सिट जितेका छन्, जुन उल्लेखनीय वृद्धि हो। केन्द्रीय निर्वाचन समितिका अनुसार रा’अम र संयुक्त सूची (तीन अरब नेतृत्वका दलको गठबन्धन) लाई करिब ८,४०,००० जनाले मत दिए, जुन सन् २०२२ को निर्वाचनको तुलनामा ६४ प्रतिशतले बढी हो।

अरब दलको यो सफलताका कारण आइजेनकोटले उनीहरूसँग गठबन्धन गरे ६७ सिटको सुविधाजनक बहुमत पुग्ने देखिन्छ। तर इजरायलका धेरैका लागि अरबहरूसँग सत्ता साझेदारी गर्ने विचार राजनीतिक रूपमा स्वीकार्य छैन।

नेतन्याहुको आरोप

नेतन्याहुले प्यालेस्टिनी–इजरायली दलहरूले निर्वाचन “चोरेको” र त्यसका लागि कतारबाट रकम लिएको आरोप लगाएका छन्। कतारले यी आरोप अस्वीकार गर्दै यसलाई दुष्प्रचार अभियान भनेको छ।

ओदेहका अनुसार इजरायली दक्षिणपन्थी वृत्तले प्यालेस्टिनी–इजरायलीहरूको ऐतिहासिक मतदानलाई “निर्वाचनी आतंकवाद” भन्दै यसलाई अक्टोबर ७ को आक्रमणसँग तुलना गरेका छन्। त्यस दिन हमास नेतृत्वका लडाकुहरूले दक्षिणी इजरायलमा आक्रमण गरी १,२०० भन्दा बढी मानिसको हत्या गरेका थिए र सयौंलाई बन्दी बनाएका थिए।

सरकार गठन कसले गर्ने भन्ने निर्णायक भूमिकामा रहेका कारण “प्यालेस्टिनी–इजरायलीहरूको मत र आवाजमाथि” आक्रमण भइरहेको उनले बताइन्।