काठमाडौं, १९ कातित्र्तक ।  रुसले युक्रेनको दक्षिणपूर्वी जापोरिझ्झिया क्षेत्रको सहायता वितरण केन्द्रमा गरेको हवाई आक्रमणमा मृत्यु हुनेको संख्या बढेर ४० पुगेको युक्रेनी अधिकारीहरूले जनाएका छन्। राष्ट्रपति भोलोदिमिर जेलेन्स्कीले बुधबार मृतकको संख्या पुनः अद्यावधिक गर्दै केही शव अझै फेला पार्न नसकिएको र ३० भन्दा बढी व्यक्ति भग्नावशेषमुनि हुन सक्ने बताए।

सोमबार भएको यो आक्रमण करिब पाँच वर्ष लामो युद्धमा नागरिकमाथि भएका सबैभन्दा घातक आक्रमणमध्ये एक मानिएको छ।

स्कुल भवनमा बम, फेरि शरणस्थलमा प्रहार

अल जजीराले उद्धृत गरेका स्थानीय अधिकारीका अनुसार अग्रिम मोर्चाको नजिकै रहेको कोमिशुवाखा गाउँमा सहायता वितरणका लागि प्रयोग भइरहेको विद्यालय भवनमा रुसले धेरै बम खसालेको थियो। त्यसपछि भूमिगत शरणस्थलमा भएको दोस्रो प्रहारमा त्यहाँ लुकेका धेरै मानिस मारिएको युक्रेनले जनाएको छ। मृतकमा चार प्रहरी अधिकृत र दुई उद्धारकर्मी पनि छन्।

यसअघि स्थानीय अधिकारीहरूले ३७ जनाको मृत्यु पुष्टि गर्दै करिब ३८ जना थुनिएको अनुमान गरेका थिए। क्षेत्रीय सैन्य प्रशासनका कार्यवाहक प्रमुख मिखाइलो सेमिकिनका अनुसार रुसी ड्रोनका कारण खोजी तथा उद्धार कार्यमा बाधा पुगिरहेको छ, तर उद्धार अभियान जारी रहनेछ।

युक्रेनी प्रहरीले मारिएका चार अधिकृतमध्ये एकको बडी क्यामेराको भिडियो सार्वजनिक गरेको छ। उक्त भिडियोमा निर्देशित हवाई बमको चेतावनी रेडियोमार्फत प्राप्त हुँदा मानिसहरूलाई शरणस्थलभित्र पठाइरहेको दृश्य देखिन्छ। केही क्षणपछि भिडियो कालो भएर आवाज पनि बन्द हुन्छ।

संयुक्त राष्ट्रसंघको युक्रेनस्थित मानवअधिकार अनुगमन नियोगले मंगलबार यो आक्रमणले अन्तर्राष्ट्रिय कानुनको उल्लङ्घन गरेको सम्भावना रहेको जनाएको छ।

जेलेन्स्कीको प्रतिक्रिया

जेलेन्स्कीले आक्रमणलाई “घृणित आतंकवादी प्रहार” भन्दै यसले रुसले तनाव घटाउन चाहँदैन भन्ने देखाएको टिप्पणी गरे। उनका अनुसार गत साता ओलेश्कीमा भएको युद्धविराम र मानवीय सहायता अभियानले सिर्जना गरेको अवसर यो आक्रमणले खेर फालेको छ।

सामाजिक सञ्जालमा उनले भने, “दुर्भाग्यवश, यो पागलपूर्ण आक्रमणप्रति विश्वको प्रतिक्रिया निकै कम छ। रुसले युक्रेन र युक्रेनीमाथि गरेका हजारौं अन्य युद्ध अपराधजस्तै यसले पनि कडा प्रतिकार माग्छ। प्रतिक्रिया नआए अनिष्टले अझ अघि बढ्ने साहस पाउँछ।”

आबु धाबी वार्ता अघि बढ्दै

यो आक्रमण अमेरिकाको मध्यस्थतामा आगामी साता हुने वार्ताको ठीक अघि भएको हो। अमेरिकी विशेष दूत स्टिभ विटकफका अनुसार युक्रेन र रुसका प्रतिनिधिमण्डल नोभेम्बर १०–११ मा आबु धाबीमा भेटेर युद्धपछिको सुरक्षा व्यवस्था, तनाव घटाउने उपाय, मानवीय कदम र युद्ध अन्त्यबारे छलफल गर्नेछन्।

अक्टोबर २१ मा सेन्ट पिटर्सबर्गमा विटकफसँगको भेटपछि रुसी राष्ट्रपति भ्लादिमिर पुटिनले वार्ताका लागि सहमति जनाएका थिए। तर यस्ता अघिल्ला वार्ताबाट खासै प्रगति भएको छैन। मस्कोले युक्रेनले भूभाग छाडून्, निःशस्त्रीकरण गरून् र नाटो सदस्यता नलिने ग्यारेन्टी देऊन् भन्ने कडा मागमा लचकता देखाएको छैन। ट्रम्प प्रशासन रुसको अडानलाई समर्थन गरिरहेझैं देखिएकोले कीव र युरोपमा चिन्ता बढेको छ।