रास्वपाकाे प्राइमरी इलेक्सन मिडियाबाजी गर्ने अस्त्र मात्र बन्यो, २५ हजार रुपैयाँ शुल्क ठगी भयाे । फिर्ता गरियोस्’ : नेता राणा

काठमाडौं, २१ माघ । राष्ट्रिय स्वतन्त्र पार्टी (रास्वपा) का नेता प्रणयशमशेर राणाले पार्टीले अवलम्बन गरेको प्रारम्भिक निर्वाचन (प्राइमरी इलेक्सन) को विधिमाथि गम्भीर प्रश्न उठाउनुभएको छ। उम्मेदवार छनोट प्रक्रिया पारदर्शी नभएको र यो केवल ‘मिडियाबाजी गर्ने अस्त्र’ मात्र बनेको भन्दै उहाँले असन्तुष्टि व्यक्त गर्नुभएको हो।

गत निर्वाचनमा काठमाडौं–५ बाट उम्मेदवार बन्नुभएका राणाले यसपटक पनि उम्मेदवार छनोट प्रक्रियामा सहभागिता जनाउनुभएको थियो। तर, पार्टीले आफ्नै विधि लत्याएर उम्मेदवार चयन गरेको भन्दै उहाँले उम्मेदवार बन्न इच्छुकहरूबाट लिइएको २५ हजार रुपैयाँ शुल्क फिर्ता गर्न माग गर्नुभएको छ।

१. शुल्क फिर्ताको माग: रास्वपाले प्रत्यक्षतर्फ उम्मेदवार हुन इच्छुक प्रत्येक आकांक्षीबाट २५ हजार रुपैयाँ शुल्क लिएको थियो। राणाले भन्नुभएको छ, “विधि अनुसार उम्मेदवार छनोट नभएपछि त्यो रकम फिर्ता दिनुपर्छ, नत्र त्यो ठगी हुन्छ। यस्ता विषयमा सार्वजनिक बहस हुनुपर्छ।”

२. विधिको उल्लंघन: पार्टीले प्रारम्भिक मतदानको प्रक्रिया पुरा नगरी अन्य दलबाट आएका वा निश्चित समूह (बालेन शाह पक्ष भनिएको) सँगको समीकरणका आधारमा टिकट वितरण गरेको राणाको आरोप छ। रास्वपाकै पृष्ठभूमिबाट आएकाहरूका लागि समेत विधि लागू नगरिएकोमा उहाँले आपत्ति जनाउनुभएको छ।

३. अपूर्ण निर्वाचन पद्धति: संसारभरि ‘प्राइमरी’ को मत नै अन्तिम हुने प्रचलन भए पनि रास्वपाले ५० प्रतिशत मात्र मतभार तोकेर उपयुक्त विधि नबनाएको राणाको ठहर छ। “शिक्षा, योग्यता र योगदानकै आधारमा भोट माग्ने हो भने प्राइमरीको नतिजा नै फाइनल हुनुपर्थ्यो,” उहाँले भन्नुभयो।

४. नेतृत्वमाथि प्रश्न: निर्वाचन आयोगमा बुझाइएको विधान विपरित कार्य भएको दाबी गर्दै राणाले पार्टीभित्र व्यक्तिवादी चरित्र र बदमासी देखिएको आरोप लगाउनुभएको छ। उहाँले प्रश्न गर्नुभयो, “अहिले नै यस्तो कार्यशैली हुने पार्टी सरकारमा गएपछि कस्तो होला? यो त एउटा अलग प्रयोग गरेका छौं भनेर मिडियाबाजी गर्ने अस्त्र मात्रै भयो।”

पछिल्लो समय रास्वपाभित्र उम्मेदवार छनोटलाई लिएर देखिएको यो असन्तुष्टिले पार्टीको आन्तरिक लोकतन्त्र र ‘प्राइमरी इलेक्सन’ को विश्वसनीयतामाथि बहस सिर्जना गरिदिएको छ।