इजिप्टको ९२ वर्ष लामो प्रतीक्षाको अन्त्य, विश्वकपमा पहिलो ऐतिहासिक जित
काठमाडाैं, ८ असार । मोहमद सलाहको प्रेरणादायी प्रदर्शनमा इजिप्टले फिफा विश्वकप २०२६ मा ऐतिहासिक सफलता हात पारेको छ। समूह ‘जी’ अन्तर्गत भएको खेलमा इजिप्टले न्युजिल्यान्डलाई ३–१ ले पराजित गर्दै विश्वकप इतिहासको पहिलो जित दर्ता गरेको हो।
क्यानडाको भ्यानकुभरस्थित बीसी प्लेस स्टेडियममा आइतबार राति सम्पन्न खेलमा न्युजिल्यान्डले सुरुआती अग्रता लिए पनि इजिप्टले उत्कृष्ट पुनरागमन गर्दै ऐतिहासिक नतिजा निकालेको हो।
खेलको १५औँ मिनेटमा फिन सर्मनले कर्नरबाट आएको बललाई हेडमार्फत गोलमा परिणत गर्दै न्युजिल्यान्डलाई अग्रता दिलाएका थिए। पहिलो हाफ १–० ले पछि परेको इजिप्टले दोस्रो हाफमा शानदार खेल प्रस्तुत गर्यो।
५८औँ मिनेटमा मोस्तफा जिकोले हेडमार्फत बराबरी गोल गरेपछि इजिप्ट खेलमा फर्किएको थियो। त्यसपछि ६७औँ मिनेटमा कप्तान सलाहले उत्कृष्ट टिम मूभको अन्त्य गर्दै गोल गरे र इजिप्टलाई २–१ को अग्रता दिलाए। खेलको ८२औँ मिनेटमा ट्रेजेगुएटले थप एक गोल गर्दै इजिप्टको जित सुनिश्चित गरे।
यो जितसँगै इजिप्टले विश्वकपमा सहभागिता जनाएको ९२ वर्षपछि पहिलो पटक जितको स्वाद चाख्न सफल भएको छ। सन् १९३४ मा विश्वकपमा डेब्यु गरेको इजिप्टका लागि यो ऐतिहासिक उपलब्धि बनेको छ।
दुई खेलपछि समूह ‘जी’ मा इजिप्ट चार अंकसहित शीर्ष स्थानमा उक्लिएको छ। इरान र बेल्जियमको समान दुई–दुई अंक रहेको छ भने न्युजिल्यान्ड एक अंकसहित पुछारमा रहेको छ।
खेलमा निर्णायक गोल गरेका सलाह ‘सुपेरियर प्लेयर अफ द म्याच’ घोषित भए। इजिप्टका लागि यो जित विश्वकपको इतिहासमा नयाँ अध्यायका रूपमा स्मरणीय रहनेछ।
