भेनेजुएलामा विनाशकारी भूकम्पले १८८ को मृत्यु, भग्नावशेषमा अझै सयौँ पुरिएको आशंका
एजेन्सी, १२ असार । भेनेजुएलामा गएको विनाशकारी भूकम्पमा परी मृत्यु हुनेको सङ्ख्या १८८ पुगेको छ। बुधबार साँझ गएको शक्तिशाली कम्पनका कारण १ हजार ५०० भन्दा बढी घाइते भएका छन् भने सयौँ मानिस अझै भग्नावशेषमा पुरिएको आशङ्का गरिएको छ।
स्थानीय समय अनुसार बुधबार साँझ ६:०४ बजे (नेपाली समय अनुसार बिहीबार बिहान ३:४९ बजे) ४० सेकेण्डको अन्तरालमा ७.२ र ७.५ म्याग्निच्युडका दुईवटा शक्तिशाली भूकम्प गएका थिए। भूकम्पको केन्द्रविन्दु क्यारिबियन तटस्थित मोरोन शहर नजिक रहेको अमेरिकी भूगर्भ सर्वेक्षणले जनाएको छ।
भूकम्पले पुर्याएको अपूरणीय क्षतिलाई मध्यनजर गर्दै कार्यवाहक राष्ट्रपति डेल्सी रोड्रिगेजले देशभर ‘संकटकाल’ घोषणा गरेकी छन्। राजधानी काराकाससहितका मुख्य सहरहरूमा बिजुली, खानेपानी र सञ्चार सेवा पूर्ण रूपमा ठप्प भएको छ।
भूकम्प प्रभावित क्षेत्रका दृश्यहरू अत्यन्तै हृदयविदारक छन्। ला ग्वाइरामा एक आमाले आफ्ना ३ र १० वर्षका सन्तानको शव कम्बलमा बेरेर रोइरहेको तस्बिरले विश्वलाई स्तब्ध बनाएको छ। हजारौँ मानिस अझै सम्पर्कविहीन छन्। राजधानी काराकासका सडकहरूमा सर्वसाधारणहरू आफ्ना हराइरहेका आफन्तको फोटोसहितको सूचना टाँस्दै भौतारिरहेका देखिन्छन्।
विद्युत् र मोबाइल नेटवर्क नहुँदा विदेशमा रहेका भेनेजुएलीहरूले आफ्ना परिवारको अवस्था बुझ्न सकेका छैनन्। कतिपय स्थानमा सरकारी उद्धार टोली नपुग्दा स्थानीयहरू आफैँले खाली हातले भग्नावशेष हटाएर आफन्तको खोजी गरिरहेका छन्।
भेनेजुएला सरकारले आवास पुनर्निर्माण र तत्काल राहतका लागि २० करोड अमेरिकी डलरको आकस्मिक कोष स्थापना गरेको छ। हाल विद्यालयहरू बन्द गरी ती भवनहरूलाई अस्थायी आश्रयस्थलका रूपमा प्रयोग गरिएको छ।
