मेची राजमार्गको राजदुवाली खण्ड भासियाे, पहाडी तीन जिल्लाको झापासँग सडक सम्पर्क विच्छेद
इलाम, २९ असार । पूर्वी नेपालको रणनीतिक महत्वको मेची राजमार्गअन्तर्गत इलामको राजदुवाली खण्ड पूर्ण रूपमा भासिएपछि इलाम, पाँचथर र ताप्लेजुङको झापासँगको सडक सम्पर्क पूर्णतः विच्छेद भएको छ।
दुई दिनदेखिको अविरल वर्षाका कारण इलाम नगरपालिका–९ स्थित ‘गोलाखर्क–राजदुवाली’ सडक खण्डमा जमिन दबेपछि प्रशासनले सोमबारदेखि यस खण्डमा सबै प्रकारका सवारीसाधन सञ्चालनमा ‘अनिश्चितकालीन’ प्रतिबन्ध लगाएको छ।
प्रमुख जिल्ला अधिकारी लक्ष्मण ढकालका अनुसार, विगत चार दिनदेखि ठूला सवारीका लागि अवरुद्ध यो सडक गएराति थप भासिएपछि सुरक्षा जोखिमलाई मध्यनजर गर्दै मोटरसाइकल समेत चलाउन नमिल्ने गरी बन्द गरिएको हो। सडक अवरुद्ध भएसँगै पहाडी जिल्लाहरूबाट झापातर्फ गइरहेका र झापाबाट खाद्यान्न तथा निर्माण सामग्री बोकेर पहाडतर्फ आइरहेका सयौँ मालवाहक ट्रक तथा यात्रुवाहक बसहरू माइखोलाको दुवै किनारमा अलपत्र परेका छन्।
राजमार्गको विकल्पका रूपमा प्रयोग गरिँदै आएका सहायक मार्गहरू समेत बाढी र पहिरोका कारण काम नलाग्ने भएका छन्:
तिल्केनी–सिमलगोला सडक: जोगमाई खोलामा बनाइएको अस्थायी डाइभर्सन आइतबारको बाढीले बगाएपछि यो मार्ग बन्द भएको छ।
मेची करिडोरकाे पुवा खोलामा रहेको डाइभर्सन समेत बाढीले बगाएकाले यो मार्गबाट पनि यातायात सम्भव छैन।
यी दुवै वैकल्पिक मार्गहरू बन्द भएपछि कोशी प्रदेशका तीन पहाडी जिल्लाहरू सङ्घीय राजधानी र तराईका जिल्लाहरूबाट भौगोलिक रूपमा ‘आइसोलेसन’ मा परेका छन्।
सडक डिभिजन इलामका प्रमुख भवन भट्टराईका अनुसार, सडक सम्पर्क सुचारु गर्न जोगमाई र पुवा खोलामा बेलीब्रिज जडान गर्नुपर्ने आवश्यकता छ। यसका लागि डेढ महिनाअघि नै ‘सिभिल’ संरचनाहरू (जग र पिलर) तयार भइसकेका छन्। यद्यपि, भारत सरकारले अनुदानमा उपलब्ध गराउने भनिएको बेलीब्रिजका सामग्रीहरू हालसम्म नआइपुग्दा निर्माण कार्य ठप्प भएको हो। कूटनीतिक र प्राविधिक समन्वयमा भएको यो ढिलासुस्तीले गर्दा विपद्को समयमा नागरिकले सास्ती खेप्नुपरिरहेको छ।
सडक सञ्जाल ठप्प भएपछि अत्यावश्यक कामका लागि यात्रा गरेका सर्वसाधारणहरू राजदुवालीको पहिरो प्रभावित क्षेत्रमा जोखिम मोलेर पैदल यात्रा गर्न बाध्य छन्। मालवाहक सवारीहरू रोकिँदा पहाडी क्षेत्रमा दैनिक उपभोग्य वस्तुहरूको अभाव हुन सक्ने र बिरामीहरूलाई थप उपचारका लागि सुविधासम्पन्न अस्पताल पुर्याउन कठिनाइ हुने देखिएको छ।
