लण्डनमा आतंकवादी आक्रमण, आतंककारीसहित ९ को मृत्यु २० घाइते

लण्डन । लण्डन ब्रिजमा एउटा गाडीलाई पैदलयात्री भएका ठाउँमा जोताइएपछि तथा नजिकैको बरो मार्केट क्षेत्रमा छुरा प्रहारका घटनामा मारिनेको संख्या ६ पुगेको प्रहरीले जनाएको छ।
साथै तीन जना संदिग्ध पुरुष हमलाकारीलाई गोली हानी मारिएको बताइएको छ। २० जना घाइतेलाई अस्पताल लगिएको बताइएको छ।
यसअघि ब्रिटिश प्रधानमन्त्री थेरेसा मे ले लण्डनमा भएका घटनालाई सम्भावित आतंकवादी घटना भन्नुभएको छ । यो घटनाक्रम तीव्ररुपमा छानबिन हुँदैछ। म घटनास्थलमा पुगेका प्रहरी तथा आपतकालीन सेवा प्रदायकप्रति आभार व्यक्त गर्न चाहन्छु। यी भयानक घटनामा परेकाहरुको कुशलताका निम्ति हामी प्रार्थना गर्छौं।ू
लण्डन ब्रिज, बरो मार्केट तथा भक्सल क्षेत्रमा भएका घटनापछि एक विज्ञप्ती जारी गर्दै ब्रिटिश प्रधानमन्त्री मे ले ती घटनालाई सम्भावित आतंकवादी घटना मान्दै छानविन भइरहेको बताएकी छन्।
मेट्रोपोलिटन प्रहरीले लण्डन ब्रिज तथा बरो मार्केट क्षेत्रको घटनालाई आतंकवादी भनेको छ।
तर उसले भक्सलको घटना लण्डन ब्रिज तथा बरो मार्केट घटनासंग नजोडिएको जनाएको छ।
विपक्षी दलका नेता जेरेमी कोर्बिनले घटनालाई निर्दयी भनेका छन्।
अमेरिकी राष्ट्रपति डोनाल्ड ट्रम्पले यस घडीमा अमेरिका ब्रिटेन तथा लण्डनको साथमा रहेको भन्दै ट्वीट गरेका छन्।
म्यानचेष्टर शहरमा एक पप कन्सर्टका बेला भएको आत्मघाती विष्फोटमा २२ जना मारिएको दुई साता नवित्दै यी घटना भएका छन्।
जेठ २१ गते ।