नेपाली स्क्वास खेलाडीलाई प्रशिक्षण दिन १७ पटकको स्पेनी च्याम्पियन गोलान नेपालमा

काठमाडौँ, चैत १८ गते । विश्व स्क्वास वरीयतामा पाँचौँ स्थानमा रहिसकेका बोर्खा गोलान नेपाली खेलाडीलाई प्रशिक्षण दिने भएका छन् ।

सोमबार एक कार्यक्रमको आयोजना गर्दै स्पेनका लेभल थ्री प्रशिक्षक गोलानलाई स्वागत गरेको छ । गोलानले एक हप्ता नेपाली स्क्वास खेलाडीलाई प्रशिक्षण दिनेछन् । सन् २०१४ मा गोलान विश्व स्क्वास वरीयतामा पाँचौँ स्थानमा थिए । उनले पिएसए विश्व टुरमा ३३ उपाधि जितिसकेका छन् । यसैगरी गोलान १७ पटकको स्पेनका राष्ट्रिय च्याम्पियन पनि हुन् । दुई पटक युरोपेली इन्डिभजुयल च्याम्पियन रहिसकेका गोलानले स्पेनको राष्ट्रिय टिमलाई विभिन्न अन्तर्राष्ट्रिय प्रतियोगतामा नेतृत्व पनि गरेका छन् ।

सन् २०२३ मा गोलानले खेलाडी जीवनबाट सन्यास लिए । त्यसपछि उनले गोलान स्क्वास एकेडेमीको स्थापना गरे । जुन एकेडेमीले युवा खेलाडी उत्पादन र सहयोग गर्ने गर्दछ । सोही एकेडेमीमा नेपालका स्क्वास खेलाडी अमृत थापा मगर पनि प्रशिक्षणमा छन् ।

४२ वर्षीय प्रशिक्षक गोलानले नेपालको बारेमा धेरै सुनेको बताउँदै आफूले नेपाली स्क्वास खेलाडीलाई थप उत्प्रेरित गर्ने लक्ष्यसहित नेपालका आएको हुँ, भनेका छन् । पछिल्ला दुई–तीन वर्षदेखि प्रशिक्षकको जिम्मेवारीमा छु, नेपालमा सिकाउने मात्र होइन, मैले पनि धेरै सिक्ने अवसर पाउनेछु– गोलान भन्छन् । नेपाल स्क्वास एन्ड राकेट्स संघका अध्यक्ष धु्रबबहादुर गुरुङले गोलानको प्रशिक्षणले नेपाली स्क्वास खेलाडीको स्तर अझ राम्रो हुने भनाई राखे । उहाँले गोलान स्क्वास फाउन्डेसनबाट युरोपका स्तरीय खेलाडीसँग अनुभव दिन नेपाली खेलाडीहरुलाई स्क्वास टुरको व्यवस्था गर्न पनि अनुरोध गरे ।

ललितपुर जिल्ला खेलकुद विकास समितिका अध्यक्ष विनोद महर्जनले गोलानको आगमन नेपालका स्क्वास खेलाडीहरुका लागि आप्नो खेल स्तर बढाउने ठूलो अवसर भएको बताए । उहाँले हेटौँडामा सक्वास कोर्ट बनाउने योजना सामेल प्रपोजको कार्य अगाडि बढेको जानकारी दिएका छन् । यसैगरी नेपाल स्क्वास एन्ड र्याकेट्स संघका निवर्तमान अध्यक्ष किशोर महर्जनले गोलानबाट खेलाडीहरुले मात्र नेपाली प्रशिक्षकहरुले पनि धेरै कुरा सिक्ने अपेक्षा गरेका छन् । नेपाललाई विगत पाँच वर्षदेखि स्वयंसेवक प्रशिक्षकको रुपमा प्रशिक्षण दिइरहेका रेन्जो एन्डोर्नोको पहलमा गोलान नेपाल आएका हुन् ।