एमाले सचिवालय बैठक: निर्वाचनको समीक्षा, नयाँ सरकारलाई बधाई र प्रेस स्वतन्त्रताको रक्षामा जोड

ललितपुर, २० चैत । नेपाल कम्युनिष्ट पार्टी (एमाले) ले गत फागुन २१ गते सम्पन्न प्रतिनिधिसभा निर्वाचनको संक्षिप्त समीक्षा गर्दै प्राप्त जनमतलाई सम्मान गर्ने निर्णय गरेको छ। ललितपुरको च्यासलस्थित पार्टी केन्द्रीय कार्यालयमा शुक्रबार बसेको सातौँ केन्द्रीय सचिवालय बैठकले निर्वाचनपछिको राजनीतिक अवस्था र सरकारका कतिपय निर्णयहरूप्रति आफ्नो आधिकारिक धारणा सार्वजनिक गरेको हो।

बैठकपछि सञ्चारकर्मीहरूलाई जानकारी दिँदै उपमहासचिव लेखराज भट्टले एमालेले निर्वाचनमार्फत अभिव्यक्त भएको जनमतलाई शिरोधार्य गर्ने बताउनुभयो। बैठकले नवनियुक्त प्रधानमन्त्री वालेन्द्र शाह र उहाँको नेतृत्वमा गठित मन्त्रिपरिषद्लाई सफल कार्यकालको शुभकामना दिँदै बधाई ज्ञापन गर्ने निर्णय गरेको छ।

पार्टीका कार्यवाहक अध्यक्ष रामबहादुर थापाको अध्यक्षतामा बसेको बैठकले संसदीय दलको नेताको निर्वाचन लोकतान्त्रिक विधिबाट सम्पन्न भएको निष्कर्ष निकालेको छ। उपमहासचिव भट्टका अनुसार एमालेले राज्यका प्रमुख अंगहरूसँगको सम्बन्धलाई थप सुदृढ बनाउने प्रतिबद्धता जनाएको छ। “मुलुकको संविधान र कानुनबमोजिम निर्माण भएका नेपाली सेनालगायत सबै सुरक्षा निकाय, निजामती प्रशासन र अन्तर्राष्ट्रिय समुदायसँग हाम्रो पार्टीको सम्बन्ध मित्रवत् छ र यसलाई भविष्यमा अझ प्रगाढ बनाइनेछ,” उहाँले भन्नुभयो।

एमाले सचिवालय बैठकले सरकारले हालै चालेका केही कदमप्रति गम्भीर असहमति प्रकट गर्दै निर्णय सच्याउन माग गरेको छ: विद्यार्थी सङ्गठनमाथिको प्रतिबन्ध: सरकारले विद्यार्थी सङ्गठनहरू खारेज गर्ने र उनीहरूमाथि प्रतिबन्ध लगाउने निर्णय लोकतन्त्र विरोधी भएको ठहर गर्दै एमालेले सो निर्णय तत्काल फिर्ता लिन माग गरेको छ।

प्रेस स्वतन्त्रताको रक्षा: सरकारी विज्ञापन सरकारी सञ्चार माध्यमलाई मात्र दिने सरकारको पछिल्लो नीतिले स्वतन्त्र प्रेसको भूमिकालाई कुण्ठित गर्ने भन्दै एमालेले यसको विरोध गरेको छ। यस्तो विभेदकारी निर्णयले लोकतन्त्रको आधारस्तम्भ मानिने सञ्चार क्षेत्र कमजोर हुने एमालेको दाबी छ।

बैठकले पश्चिम एसियामा जारी हिंसात्मक द्वन्द्वप्रति चिन्ता व्यक्त गर्दै त्यहाँ कार्यरत लाखौँ नेपालीहरूको सुरक्षा सुनिश्चित गर्न सरकारको ध्यानाकर्षण गराएको छ। स्वदेश फर्किन चाहने नेपाली नागरिकहरूलाई सुरक्षित रूपमा ल्याउने व्यवस्था मिलाउन सरकारसँग विशेष माग गरिएको उपमहासचिव भट्टले जानकारी दिनुभयो।

निर्वाचनपछिको नयाँ राजनीतिक परिस्थितिमा एमालेको यो बैठकले पार्टीको आगामी कार्यदिशा र सरकारप्रतिको दृष्टिकोणलाई प्रष्ट पारेको छ। Press statement Chaitra 20 Final