पुनः श्रम स्वीकृतिका लागि वैदेशिक रोजगार विभागद्वारा नयाँ मापदण्ड जारी

काठमाडौँ, जेठ १८ । वैदेशिक रोजगार विभागले वैदेशिक रोजगारीमा रहेका नेपाली श्रमिकहरूका लागि प्रदान गरिने पुनः श्रम स्वीकृति प्रक्रियालाई थप व्यवस्थित र सुरक्षित बनाउन नयाँ मापदण्डसहितको स्वचालित प्रणाली कार्यान्वयनमा ल्याएको छ । विभागले आज एक सूचना जारी गर्दै अनलाइनमार्फत प्राप्त हुने आवेदनहरूका लागि निश्चित शर्तहरू निर्धारण गरेको जानकारी दिएको हो ।

नयाँ व्यवस्थाअनुसार स्वचालित प्रणालीबाट पुनः श्रम स्वीकृति प्राप्त गर्न श्रमिकले यसअघि श्रम स्वीकृति लिएकै मुलुक र कम्पनीमा कार्यरत रहेको हुनुपर्नेछ। संस्था वा रोजगारदाता कम्पनी परिवर्तन गरेका श्रमिकहरूको हकमा भने यो स्वचालित नियम लागू नहुने विभागले स्पष्ट पारेको छ।

स्वचालित प्रणालीमार्फत आवेदन दिँदा  राहदानीको म्याद कम्तीमा तीन महिना बाँकी हुनुपर्छ ।  सम्बन्धित मुलुकको भिसा वैध हुनुपर्छ ।   रोजगारदाता कम्पनीसँगको करार सम्झौता अनिवार्य हुनुपर्छ ।  सामाजिक सुरक्षा कोष र वैदेशिक रोजगार कल्याणकारी कोषमा तोकिएको रकम जम्मा गरेको हुनुपर्छ ।   आवधिक जीवन बीमा नवीकरण गरिएको हुनुपर्छ ।   

वैदेशिक रोजगारीलाई सुरक्षित, मर्यादित र पारदर्शी बनाउने उद्देश्यले यो प्रणाली अवलम्बन गरिएको विभागको भनाइ छ। विभागका अनुसार तोकिएका शर्तहरू पूरा नभएका आवेदनहरू प्रणालीले स्वतः अस्वीकृत गर्नेछ । तसर्थ, प्रक्रियागत झन्झटबाट बच्न र समयमै स्वीकृति प्राप्त गर्न सम्पूर्ण कागजात र विवरण दुरुस्त राख्न विभागले सेवाग्राहीहरूमा आग्रह गरेको छ ।