फिलिपिन्समा ७.८ म्याग्निच्युडको शक्तिशाली भूकम्प: एसियाका विभिन्न देशमा सुनामीको उच्च सतर्कता

मनिला (एजेन्सी),  २५ जेठ ।  फिलिपिन्सको मिन्डानाओ टापु नजिकै सोमबार बिहान ७.८ म्याग्निच्युडको अत्यन्तै शक्तिशाली भूकम्प गएको छ। अमेरिकी भौगर्भिक सर्वेक्षण का अनुसार, स्थानीय समय अनुसार बिहान ७:४० बजे गएको यस भूकम्पपछि फिलिपिन्ससहित इन्डोनेसिया र जापानका तटीय क्षेत्रहरूमा सुनामी आउन सक्ने भन्दै चेतावनी जारी गरिएको छ।

भूकम्पको केन्द्रविन्दु मिन्डानाओ टापुभन्दा केही टाढा समुद्रमा रहेको जनाइएको छ। सुरुमा भूकम्पको तीव्रता ८.२ म्याग्निच्युड रहेको अनुमान गरिए पनि पछि USGS ले यसलाई ७.८ मा संशोधन गरेको थियो।

सुनामीको गम्भीर खतरा र छालको प्रक्षेपण

‘प्यासिफिक सुनामी वार्निङ सेन्टर’  का अनुसार फिलिपिन्सका तटीय क्षेत्रहरूमा ३ मिटर (करिब १० फिट) सम्मको अग्लो सुनामीको छाल ठोक्किन सक्ने जोखिम छ। त्यसैगरी, इन्डोनेसिया र मलेसियाका केही भागमा १ मिटर सम्मको छाल आउन सक्ने प्रक्षेपण गरिएको छ।

यसैबीच, अमेरिकी राष्ट्रिय सुनामी चेतावनी केन्द्रले यो भूकम्पबाट अमेरिकाको तटीय क्षेत्रमा भने कुनै खतरा नरहेको स्पष्ट पारेको छ। तर, जापानका सरकारी अधिकारीहरूले पनि आफ्ना प्रशान्त तटीय क्षेत्रमा जोखिम हुन सक्ने भन्दै सावधानी अपनाउन अपिल गरेका छन्।

फिलिपिन्समा सुरक्षित स्थानमा जान निर्देशन

फिलिपिन्सको भूगर्भ तथा ज्वालामुखी विज्ञान संस्थानले साराङ्गानी, दाभाओ ओक्सीडेन्टल, तावी-तावी र सुलु लगायत ९ वटा प्रान्तका बासिन्दाहरूलाई तत्काल सुरक्षित र उच्च स्थानमा जान निर्देशन दिएको छ।

संस्थानले जारी गरेको विशेष बुलेटिनमा भनिएको छ, “तटीय क्षेत्र, नदीको मुहान वा उथले पानीमा डुङ्गा भएका मालिकहरूले आफ्ना डुङ्गाहरूलाई सुरक्षित स्थानमा बाँध्न वा तटभन्दा टाढा लैजान आवश्यक छ। समुद्रको गहिराइमा रहेका डुङ्गाहरूलाई अर्को सूचना नआएसम्म गहिरो पानीमै रहन सल्लाह दिइन्छ।”

प्रशासनिक सक्रियता

भूकम्पपछि इन्डोनेसिया र जापानका अधिकारीहरूले पनि आफ्ना नागरिकहरूलाई तटीय क्षेत्रबाट टाढा रहन र सुरक्षा सतर्कता अपनाउन ‘अलर्ट’ जारी गरेका छन्। भूकम्पका कारण भएको भौतिक तथा मानवीय क्षतिको विवरण भने अझै प्राप्त भइसकेको छैन।

फिलिपिन्स ‘प्यासिफिक रिङ अफ फायर’ मा अवस्थित रहेकाले यहाँ बारम्बार भूकम्प र ज्वालामुखी विस्फोटका घटनाहरू भइरहन्छन्। उद्धार टोली र स्थानीय निकायहरूलाई सम्भावित सुनामीको सामना गर्न तयारी अवस्थामा राखिएको अन्तर्राष्ट्रिय सञ्चार माध्यमहरूले जनाएका छन्।