नेपाल मेडिकल काउन्सिलद्वारा ‘हेलो एनएमसी’ सञ्चालन: अब अनलाइनबाटै उजुरी र गुनासो गर्न सकिने

काठमाडौँ, ११ असार । नेपाल मेडिकल काउन्सिल (एनएमसी) ले चिकित्सक तथा स्वास्थ्य सेवाका सम्बन्धमा सर्वसाधारणका गुनासा र उजुरी सुन्न अनलाइन पोर्टल ‘हेलो एनएमसी’ (Hello NMC) सञ्चालनमा ल्याएको छ। काउन्सिलको कामकारबाहीलाई प्रविधिमैत्री र पारदर्शी बनाउने उद्देश्यले यो नयाँ प्रणाली सुरु गरिएको हो।

काउन्सिलका निमित्त रजिस्ट्रार डा. दीपेन्द्र पाण्डेका अनुसार अब सेवाग्राही र दर्तावाला चिकित्सकले सामान्य गुनासो वा सुझावका लागि काठमाडौँस्थित काउन्सिलको कार्यालयमै धाउनुपर्ने बाध्यता हटेको छ। “विशेषगरी दूरदराजबाट आउने सेवाग्राहीका लागि सामान्य कामका लागि पनि काठमाडौँ आउँदा समय र खर्च बढी लाग्ने गरेको थियो, अब त्यो समस्या समाधान हुनेछ,” डा. पाण्डेले भने।

विगतमा चिकित्सकविरुद्ध उजुरी दिने प्रक्रिया झन्झटिलो हुनुका साथै उजुरीमाथि के-कस्तो कारबाही भइरहेको छ भन्ने जानकारी पाउन कठिन थियो। नयाँ प्रणालीमा उजुरी दर्ता गर्नेबित्तिकै प्रणालीले स्वचालित रूपमा एउटा ‘ट्र्याकिङ नम्बर’ उपलब्ध गराउनेछ।
यसै नम्बरका आधारमा उजुरीकर्ताले आफ्नो उजुरीमाथि भइरहेको छानबिन वा कारबाहीको पछिल्लो अवस्थाबारे एसएमएस र इमेलमार्फत निरन्तर जानकारी पाउने व्यवस्था मिलाइएको छ। उजुरीकर्ताले आफ्नो पहिचान खुलाएर वा नाम गोप्य राखेर पनि उजुरी दर्ता गराउन सक्ने सुविधा पोर्टलमा दिइएको छ।

सर्वसाधारणका लागि: काउन्सिलको आधिकारिक वेबसाइट www.nmc.org.np मा गएर ‘हेलो एनएमसी’ पोर्टलमा क्लिक गरी उजुरी वा सुझाव दर्ता गर्न सकिनेछ।
चिकित्सकका लागि: दर्तावाला चिकित्सकहरूले doctor.nmc.org.np मा गई आफ्नो व्यक्तिगत एकाउन्टमा लगइन गरेर गुनासो दर्ता गर्न सक्नेछन्।
यो पोर्टलको सुरुवातसँगै चिकित्सक र बिरामीबीचको गुनासो व्यवस्थापन थप सहज र प्रभावकारी हुने विश्वास काउन्सिलले लिएको छ।