एजेन्सी, १६ असार । इरानले संयुक्त राज्य अमेरिकासँग निकट भविष्यमा हुने भनिएको प्रत्यक्ष कूटनीतिक वार्ताको दाबीलाई अस्वीकार गरेको छ। आगामी दिनहरूमा दुई देशबीच कुनै पनि स्तरमा नयाँ राजनीतिक वार्ता नहुने पुष्टि गर्दै तेहरानले हाल कायम रहेको प्रारम्भिक समझदारी पत्र (एमओयू) को प्राविधिक कार्यान्वयन र अनुगमनका लागि मात्र आफ्ना विज्ञहरूको टोली कतारको दोहा पठाउन लागेको जनाएको हो।

इरानी विदेश मन्त्रालयका प्रवक्ता इस्माइल बाघाईले नयाँ चरणको वार्ता सुरु गर्नुको सट्टा विद्यमान सम्झौताहरूको व्यावहारिक कार्यान्वयनलाई तेहरानले कडा प्राथमिकता दिएको बताउनुभयो। तसनीम समाचार एजेन्सीका अनुसार समझदारी अनुरूप अमेरिकाले इरानी कच्चा तेल बिक्रीलाई सहज बनाउन आवश्यक वित्तीय अनुमतिहरू जारी गरिसकेको छ।

इरानले विशेष गरी आफ्नो रोक्का वित्तीय सम्पत्तिको व्यवस्थापन र नियन्त्रण गर्ने सम्झौताको धारा ११ को व्यावहारिक कार्यान्वयनमा ध्यान केन्द्रित गरिरहेको प्रवक्ता बाघाईले जानकारी दिनुभयो।

अमेरिकी राष्ट्रपति डोनाल्ड ट्रम्पले मङ्गलबार कतारको दोहामा इरानसँग उच्चस्तरीय कूटनीतिक वार्ता हुने घोषणा गर्नुभएको थियो। सो घोषणा अनुरूप अमेरिकी विशेष दूत स्टिभ विटकोफ कतार प्रस्थान गरे पनि इरानले उहाँको भ्रमण इरानी टोलीको कार्यभारसँग “पूर्ण रूपमा असम्बन्धित” रहेको दाबी गरेको छ।

प्रवक्ता बाघाईले अन्तिम र औपचारिक सम्झौताका लागि अझै वार्ताको चरण सुरु नभएको स्पष्ट पार्दै सम्झौताका धारा १, ४, ५, १० र ११ को सफल र दिगो कार्यान्वयन भएपछि मात्र औपचारिक वार्ता प्रक्रिया अघि बढ्न सक्ने स्पष्ट पार्नुभयो।

यसैबीच, इरानका राष्ट्रपति मसूद पेजेशकियानले अमेरिकाले आफ्नो प्रतिबद्धता पूरा गरेमा इरान पनि समझदारी अक्षरसः पालना गर्न तयार रहेको बताउनुभएको छ। सामाजिक सञ्जाल एक्स (X) मा लेख्दै राष्ट्रपति पेजेशकियानले कूटनीतिक समझदारी दुईतर्फी मार्ग भएको उल्लेख गर्दै अमेरिकी पक्षले सम्झौताको पालना गरे इरान आफ्नो प्रतिबद्धतामा कटिबद्ध रहने स्पष्ट पार्नुभयो।