बागमती र गण्डकीमा ‘धेरै भारी’ वर्षाको सम्भावना

काठमाडौँ, १८ साउन । नेपालमा मनसुनी वायुको प्रभाव कायमै रहेकाले आज कोशी, बागमती र गण्डकी प्रदेशका केही स्थानमा भारी तथा धेरै भारी वर्षाको सम्भावना रहेको छ । जल तथा मौसम विज्ञान विभागका अनुसार हाल मनसुनको न्यून चापीय रेखा सरदर स्थानभन्दा केही उत्तरतर्फ नेपालको तराई भू-भाग नजिकै अवस्थित छ ।

हाल देशभरको मौसममा सामान्यदेखि पूर्ण बदली रहेको छ । विभागले सार्वजनिक गरेको मौसम बुलेटिन अनुसार आज पहाडी भेगका धेरै र तराईका केही स्थानमा हल्कादेखि मध्यम वर्षा हुने अनुमान गरिएको छ ।

विशेष गरी बागमती र गण्डकी प्रदेशका पहाडी भू-भागका एक-दुई स्थानमा आज ‘धेरै भारी’ वर्षा हुन सक्ने प्रक्षेपण गरिएको छ । यसैगरी, कोशी, बागमती र गण्डकी प्रदेशका हिमाली तथा पहाडी भू-भागका थोरै स्थानमा भारी वर्षाको सम्भावना छ । मधेस, लुम्बिनी र सुदूरपश्चिम प्रदेशका तराई क्षेत्रमा पनि मेघगर्जन र चट्याङसहित मध्यम वर्षा हुन सक्ने विभागले जनाएको छ ।

आज राति पनि देशभरको मौसममा उल्लेख्य सुधार हुने देखिँदैन । राति कोशी, बागमती र गण्डकी प्रदेशका हिमाली तथा पहाडी भागमा मध्यम वर्षा र उच्च हिमाली क्षेत्रमा हिमपातको सम्भावना रहेको छ ।