मनसुन थप सक्रिय: देशभर वर्षाको सम्भावना, यी ६ प्रदेशमा ‘भारी झरी’को चेतावनी

काठमाडौँ, २४ साउन । देशभर मनसुनी वायुको प्रभाव कायम रहेकाले आज पनि अधिकांश स्थानमा वर्षा र केही क्षेत्रमा भारी वर्षाको सम्भावना देखिएको छ। जल तथा मौसम पूर्वानुमान महाशाखाका अनुसार मनसुनको न्यून चापीय रेखा सरदर स्थानकै आसपास रहेकाले देशभर मौसम बदली भई वर्षा जारी रहनेछ।

आज दिउँसो देशभर साधारणतया बादल लाग्नेछ। देशका पहाडी भू-भागका धेरै स्थानहरूमा मध्यम वर्षाको सम्भावना छ। यस्तै, लुम्बिनी, सुदूरपश्चिम, मधेस, कोशी, बागमती र गण्डकी प्रदेशका तराई क्षेत्रका केही स्थानमा पनि पानी पर्ने महाशाखाले जनाएको छ।
विशेष गरी कोशी, बागमती, गण्डकी, कर्णाली र लुम्बिनी प्रदेशका एक-दुई स्थानमा भारी वर्षाको सम्भावना रहेको छ। हिमाली क्षेत्रका केही स्थानमा भने मध्यम वर्षासँगै हिमपात हुन सक्ने पूर्वानुमान गरिएको छ।

रातिको समयमा पनि मौसममा सुधार हुने देखिँदैन। कोशी, गण्डकी, लुम्बिनी र सुदूरपश्चिम प्रदेशका धेरै स्थानमा मध्यम वर्षा हुनेछ। यस्तै, कोशी, गण्डकी, सुदूरपश्चिम र बागमती प्रदेशका थोरै स्थानमा भारी वर्षाको समेत सम्भावना रहेको महाशाखाले बुलेटिनमार्फत जानकारी दिएको छ।

लगातारको वर्षा र केही स्थानमा हुन सक्ने भारी वर्षाका कारण गेग्रान बहाव, बाढी, पहिरो तथा भूक्षयको जोखिम बढेको छ। महाशाखाले नदी तटीय क्षेत्र र भिरालो जमिनमा बस्ने बासिन्दालाई उच्च सतर्कता अपनाउन अनुरोध गरेको छ।

वर्षाका कारण दैनिक जनजीवन, कृषि, पर्यटन तथा सडक र हवाई यातायात सेवा समेत प्रभावित हुन सक्ने देखिएको छ। यात्रामा निस्कनुअघि सडकको अवस्था बुझ्न र मौसमसम्बन्धी पछिल्लो जानकारी लिइरहन सर्वसाधारणलाई आग्रह गरिएको छ।