नेवार समुदायमा आज परम्परागत ‘गठेमङ्गल’ (घण्टाकर्ण चतुर्दशी) पर्व मनाइँदै
काठमाडौँ, २६ साउन । श्रावण कृष्ण चतुर्दशीका दिन आज काठमाडौँ उपत्यकासहित देशविदेशमा रहेका नेवार समुदायले परम्परागत ‘गठेमङ्गल’ अर्थात् घण्टाकर्ण चतुर्दशी पर्व हर्षोल्लासका साथ मनाउँदै छन्। धार्मिक एवं सांस्कृतिक मान्यताअनुसार यस दिन घरआँगन शुद्ध पार्ने, फलामका औँठी लगाउने र भूतप्रेत मन्छाउने गरिन्छ।
पौराणिक लोककथानुसार परापूर्वकालमा समाजमा मानिसहरूलाई दुःख दिने र ईश्वरको नाम सुन्न नचाहने ‘घण्टासुर’ (घण्टाकर्ण) नामको नरभक्षी राक्षस थियो। धार्मिक प्रवचन र प्रार्थना सुन्नु नपरोस् भनी उसले आफ्ना दुवै कानमा ठूला घण्टाहरू झुण्ड्याएको थियो। आहाराको खोजीमा निस्किएको सो राक्षसलाई गाउँलेहरूको हितका लागि एक तान्त्रिकले भ्यागुतोको रूप लिई हिलो र धाप भएको दलदलतर्फ डोर्याएका थिए। दलदलमा फसेको सो राक्षसलाई गाउँलेहरूले ढुङ्गाले हानेर मारेको लोकविश्वास छ। सोही लोककथाका आधारमा प्रत्येक वर्ष यो पर्व मनाउने गरिन्छ।
तान्त्रिक मान्यताअनुसार गत वैशाखको अक्षय तृतीयाका दिन रोपाइँ तथा कृषिकार्य सहज बनाउन आह्वान गरिएका अदृश्य शक्ति तथा भूतप्रेतहरूलाई आजैका दिन तन्त्रोक्त विधिद्वारा ससम्मान बिदा गरिने जनविश्वास छ।
यस पर्वका दिन बिहानै घर सफासुग्घर गरी पूजापाठ गरिन्छ। दिउँसो हरियो नर्कट, निगालो वा गहुँको छ्वाली मिसाएर तीनखुट्टे राक्षसको प्रतीकात्मक पुत्ला बनाई दोबाटो र चौबाटोहरूमा ठड्याइन्छ। केटाकेटीहरूले बाटोमा डोरी टाँगेर बटुवाहरूसँग जगात् (कर) माग्ने र साँझपख राँको बाली उक्त पुत्लालाई घिसार्दै नजिकैको नदी वा खोला किनारमा लगेर जलाउने गरिन्छ।
घण्टाकर्णको पुत्ला सेलाएपछि घरको मुख्य ढोकामा भूतप्रेत प्रवेश नगरून् भनी फलामको तीनखुट्टे वा पाँचखुट्टे किला ठोक्ने र हातमा फलाम, पित्तल वा तामाका औँठी लगाउने चलन छ। भक्तपुरमा भने मल्लकालीन परम्पराअनुसार चौबाटोहरूमा हाँडीमा दही–च्युरा र सम्यबजी राखेर भूतप्रेत मन्छाउने विशिष्ट परम्परा समेत रहँदै आएको छ।
