अष्ट्रेलिया भ्रमणको अन्तिम खेल: न्युजिल्यान्ड ‘ए’ विरुद्ध नेपाल ‘ए’ ले टस जितेर ब्याटिङ गर्दै

काठमाडौँ, २१ भदौ । अष्ट्रेलिया भ्रमणमा रहेको नेपालको ‘ए’ पुरुष क्रिकेट टोलीले आज आफ्नो तेस्रो तथा अन्तिम एकदिवसीय खेलमा न्युजिल्यान्ड ‘ए’ को सामना गर्दैछ । डार्विनस्थित मरारा क्रिकेट मैदानमा भइरहेको यस खेलमा नेपालले टस जितेर पहिले ब्याटिङ गर्ने निर्णय गरेको छ ।

नेपाल आजको खेलमा न्युजिल्यान्ड ‘ए’ लाई पराजित गर्दै आफ्नो अष्ट्रेलिया भ्रमणको सुखद अन्त्य गर्न चाहन्छ । यसअघि भएका दुई खेलमा भने नेपालले लगातार हार बेहोरेको थियो । नेपाल पहिलो खेलमा तास्मिनियासँग २ विकेटले र दोस्रो खेलमा दक्षिण अष्ट्रेलियासँग १३८ रनको फराकिलो अन्तरले पराजित भएको थियो ।

आजको खेलका लागि नेपाली टोलीमा एक परिवर्तन गरिएको छ । अलराउन्डर नारायण जोशीको स्थानमा विपिन खत्रीलाई अन्तिम ११ (प्लेइङ-११) मा समेटिएको छ । यद्यपि, टोलीका प्रमुख ब्याटर कुशल भुर्तेल भने चोटका कारण आजको खेलमा पनि मैदान बाहिरै रहेका छन् ।

नेपालले पहिले ब्याटिङ गर्दै न्युजिल्यान्डसामु बलियो योगफल खडा गरेर शृङ्खलामा पहिलो जित दर्ता गर्ने रणनीतिका साथ मैदान उत्रिएको छ ।