३० वर्षपछि विश्वकपमा नर्वेको पुनरागमन, हालान्डको नेतृत्वमा इराकविरुद्ध चुनौती

झण्डै तीन दशकको लामो प्रतीक्षापछि फिफा विश्वकपमा पुनरागमन गरेको नर्वेले बुधवार  बोस्टनमा इराकविरुद्ध खेल्दै आफ्नो अभियानको सुरुवात गर्दैछ। सन् १९९८ पछि पहिलो पटक विश्वकप खेल्न लागेको नर्वेका लागि यसपटकको यात्रा ऐतिहासिक र चुनौतीपूर्ण दुवै हुने देखिएको छ।

नर्वेलाई प्रतियोगिताकै सबैभन्दा कठिन मानिएको समूह ‘आई’ मा राखिएको छ। यस समूहमा नर्वे र इराकसँगै फुटबलका हस्ती टोलीहरू फ्रान्स र सेनेगल रहेका छन्। फुटबल पण्डितहरूले यस समूहलाई ‘ग्रुप अफ डेथ’ को संज्ञा दिएका छन्।

पहिलो खेलको पूर्वसन्ध्यामा बोल्दै नर्वेका मुख्य प्रशिक्षक स्टाले सोलबाकेनले इराकविरुद्धको खेललाई अत्यन्त महत्वपूर्ण बताएका छन्। उनले भने, “विश्वकपमा देशको नेतृत्व गर्नु कुनै पनि प्रशिक्षकका लागि सर्वोच्च उपलब्धि हो। हामी पहिलो खेलबाटै तीन अंक जोड्ने लक्ष्यमा छौँ। विजयी सुरुआतले हामीलाई नकआउट चरणतर्फ अघि बढ्न ठूलो मद्दत पुग्नेछ।”

नर्वेको आशाको मुख्य केन्द्रमा विश्व फुटबलका चर्चित स्ट्राइकर एर्लिङ हालान्ड रहेका छन्। प्रशिक्षक सोलबाकेनले हालान्डलाई विश्वकै उत्कृष्ट गोलकर्ताको संज्ञा दिँदै उनी पूर्ण रूपमा फिट रहेको जानकारी दिए। “हालान्डमा अवसर पाउँदा गोलमा परिणत गर्न सक्ने असाधारण क्षमता छ। उनी हाम्रो टोलीका लागि निर्णायक खेलाडी हुन्,” प्रशिक्षकले थपे।

यस्तै, मिडफिल्डर प्याट्रिक बर्गले वर्तमान नर्वेली टोलीलाई देशको इतिहासकै सबैभन्दा प्रतिभाशाली टोलीको रूपमा व्याख्या गरेका छन्। हालान्ड र मार्टिन ओडेगार्डजस्ता विश्वस्तरीय क्लबहरूमा मुख्य भूमिका खेलिरहेका खेलाडीहरूको उपस्थितिले यस पुस्ताले विश्वकपमा विशेष छाप छाड्ने विश्वास बर्गको छ। अर्का मिडफिल्डर सान्डर बर्गेले पनि विश्वकपमा देशको प्रतिनिधित्व गर्न पाउनु आफ्नो जीवनकै सबैभन्दा गर्वको क्षण भएको बताउँदै विश्व फुटबलको ध्यान नर्वेमाथि केन्द्रित भएको उल्लेख गरे।

नर्वेका लागि पुनरागमन सुखद बनाउन ४० वर्षपछि विश्वकपमा फर्किएको इराकको चुनौती पार गर्नु पहिलो खुड्किलो हुनेछ। उत्तर अमेरिकामा जारी यस विश्वकपमा बलियो टोलीका साथ मैदान उत्रन लागेको नर्वेले यो अवसरलाई ठूलो उपलब्धिमा बदल्न चाहेको छ।

प्रतियोगिताकै रोचक भिडन्तमध्येको एक मानिएको यो खेल नेपाली समय अनुसार बुधवार  राति ०३ः४५ हुनेछ।