अयोध्याको राम मन्दिरमा ‘भ्रष्टाचारको भूकम्प’: करोडौँको चन्दा हिनामिना भएको आरोप

नयाँ दिल्ली/अयोध्या ।  भारतको हिन्दू आस्थाको केन्द्र मानिएको अयोध्यास्थित राम मन्दिर अहिले गम्भीर भ्रष्टाचारको आरोपमा घेरिएको छ। मन्दिर व्यवस्थापनका लागि संकलन गरिएको करोडौँ डलर बराबरको चन्दा र बहुमूल्य उपहारहरू हिनामिना भएको तथ्य बाहिरिएपछि प्रधानमन्त्री नरेन्द्र मोदी नेतृत्वको सरकार र भारतीय जनता पार्टी (भाजपा) ठूलो नैतिक संकटमा परेको छ।

आस्थामाथि विश्वासघात: ‘भगवानको नाममा लुट’
अयोध्याका ६५ वर्षीय ब्रजेश कुमार, जसले दशकौँदेखि यो सहरको परिवर्तन देख्दै आएका छन्, अहिले आफूलाई ठगिएको महसुस गर्छन्। “हाम्रो आस्थाको लुट भएको छ,” उनले अलजजिरासँग भने, “यिनीहरूलाई छोडिदिने हो भने एकदिन धर्मको नाममा हामीलाई नै बेचिदिनेछन् र आफ्नो खल्ती भर्नेछन्।”

यो आक्रोश ब्रजेशको मात्र होइन, भारतभरका लाखौँ भक्तहरूको हो, जसले मन्दिर निर्माणका लागि आफ्नो गाँस काटेर दान दिएका थिए।

कसरी बाहिरियो काण्ड?
मन्दिर व्यवस्थापन गर्ने ‘श्री राम जन्मभूमि तीर्थ क्षेत्र ट्रस्ट’ का एकाउन्टिङ टोलीका पूर्व सुपरीवेक्षक महिपाल सिंहले आर्थिक अनियमितताको विषय सार्वजनिक गरेपछि यो काण्डले राजनीतिक रूप लिएको हो। त्यसलगत्तै उत्तर प्रदेशका पूर्व मुख्यमन्त्री तथा समाजवादी पार्टीका नेता अखिलेश यादवले करोडौँ रुपैयाँ चन्दा हराएको भन्दै छानबिनको माग गरे।

बढ्दो दबाबका बीच उत्तर प्रदेश सरकारले तीन सदस्यीय अनुसन्धान टोली गठन गरेको थियो। अनुसन्धानका क्रममा नगद गन्ती गर्ने र बहुमूल्य वस्तुहरूको रेखदेख गर्ने कर्मचारीसहित कम्तीमा ८ जनालाई प्रहरीले पक्राउ गरिसकेको छ।

सुन र चाँदीका इँटाहरू नै बेपत्ता
भक्तहरूले मन्दिरका लागि दिएका चाँदीका इँटाहरू, सुनका गहना र अन्य बहुमूल्य धातुहरू कहाँ गए भन्ने प्रश्न अहिले टड्कारो बनेको छ। धेरै भक्तहरूले आफ्ना उपहारहरूको हिसाब माग्दै उजुरी दिन थालेका छन्।

यही विवादका बीच ट्रस्टका शक्तिशाली महासचिव चम्पत रायसहित केही उच्च पदाधिकारीहरूले राजीनामा दिएका छन्। चम्पत राय राम मन्दिर आन्दोलनका प्रमुख अनुहार मानिन्थे।

कट्टर समर्थकहरू नै आक्रोशित
सन् १९९२ मा बाबरी मस्जिद भत्काउने घटनामा संलग्न रहेका सन्तोष दुबेसमेत यो भ्रष्टाचारबाट आक्रोशित छन्। “यो भ्रष्टाचारले मलाई शब्दमा व्यक्त गर्न नसकिने पीडा दिएको छ,” उनले भने, “धूर्त र बेइमान चोरहरूले राम मन्दिर चलाइरहेका छन्। यस्ता मानिसहरूलाई मृत्युदण्डको सजाय हुनुपर्छ।”

उनका अनुसार भाजपाले आफूलाई ‘हिन्दू धर्मको रक्षक’ दाबी गरिरहँदा मन्दिरभित्रै भएको यो लुटले उसको छविमा गम्भीर धक्का पुऱ्याएको छ।

राजनीतिक असर र आगामी चुनाव
भारतको सबैभन्दा बढी जनसङ्ख्या भएको राज्य उत्तर प्रदेशमा केही महिनापछि महत्त्वपूर्ण निर्वाचन हुँदैछ। निर्वाचनको मुखमा आफ्नै कार्यकालमा ‘प्राण प्रतिष्ठा’ गरिएको मन्दिरमा भ्रष्टाचार हुनु भाजपाका लागि निकै महँगो पर्न सक्ने विश्लेषण गरिएको छ।

यसअघि सन् २०२१ मा पनि मन्दिरको जग्गा खरिदमा अनियमितता भएको आरोप लागेको थियो। (स्रोतः अन्तराष्ट्रिय न्यूज एजेन्सी)