क्रिकेटर सन्दीप लामिछाने एसिया कप खेल्न पाकिस्तान प्रस्थान

काठमाडौं, ११ भदौ । क्रिकेटर सन्दीप लामिछाने एसिया कप खेल्न पाकिस्तान प्रस्थान गरेका छन् ।

राष्ट्रिय खेलकुद परिषद्का सदस्य सचिव टंकलाल घिसिङ लामिछानेलाई विदा गर्न विमानस्थल पुगेका थिए । एसिया कप खेल्न पाकिस्तान जान लागेका क्रिकेटर सन्दीप लामिछानेलाई उनले शुभकामना दिएका छन् ।

सदस्य सचिव घिसिङले सन्दीपको उपस्थिति नेपालको लागि निकै महत्त्वपूर्ण रहेको बताए । उनी गएसँगै नेपाली टिमले पूर्णता पाउने विश्वास उनले व्यक्त गरे ।

विमानस्थलकाे सभाकक्षमा लामिछानेले सञ्चारकर्मीहरुसँग कुरागर्दै सन्दीपले पाकिस्तान र भारतसँग खेल्न आफू उत्साहित रहेको बताए । आफू पूर्ण रूपमा फिट रहेको र टिममा घुलमिल हुन समय नलाग्ने पनि उनले प्रष्ट पारेका थिए ।

उनले भने, ‘त्यो खेलमा हार जित भन्दा पनि हामीले उहाँहरुबाट सिक्नसक्ने कुरा महत्वपूर्ण हुनेछ । एसिया कपमा राम्रो गर्ने आशा छ।’