काठमाडौंमा दुई स्थानमा आगलागी, एक करोड बराबरको क्षति

काठमाडौं, ७ असोज । काठमाडौंकाे दुई स्थानमा भएकाे आगलागीबाट करिब एक करोड रुपैयाँ बराबरको धनमालमा क्षति पुगेकाे छ ।

काठमाडौंकाे चन्द्रागिरि नगरपालिका-११ सतुंगलमा रहेको चप्पल कारखानामा आगलागी हुँदा ९० लाख रुपैयाँ भन्दा बढीको र चाबहिलस्थित एक घरमा आगलागी हुँदा १० लाख रुपैयाँ बराबरको धनमाल जलेर नष्ट भएको प्रहरीले प्रारम्भिक अनुमान गरेकाे छ ।

सतुंगलमा चोककुमार श्रेष्ठले सन्चालन गरेको चप्पल कारखानामा गए राति विद्युत् सर्ट भएर आगलागी भएको थियो भने आगलागीबाट कारखानामा रहेका मेसिन, केमिकल, चप्पल तथा चप्पल बनाउने कच्चा पदार्थ सबै जलेर नष्ट भएको छ ।

आगलागीबाट भएको क्षतिको विवरण संकलनको काम जारी रहेकाे प्रहरीले जनाएकाे छ । यद्यपि आगलागीबाट ९० लाख रुपैयाँभन्दा बढीको क्षति भएको अनुमान गरिएको चन्द्रागिरि प्रहरीले जनाएको छ ।

गएराति नै काठमाडौंको चाबहिलमा इन्द्रनारायण मानन्धरको घरमा खाना पकाउने ग्यास लिक भएर आगलागी हुँदा करिब १० लाख रुपैयाँ बराबरको धनमाल जलेर नष्ट भएको प्रहरीले जनाएको छ ।