सत्ता हस्तान्तरणको प्रतिबद्धता जनाउँदै प्रधानमन्त्रीले भने– ‘ज्ञान, सीप र पुँजी लिएर स्वदेश फर्कनुहोस्’

म्याड्रिड (स्पेन), १९ असार । स्पेन भ्रमणमा रहनुभएका प्रधानमन्त्री केपी शर्मा ओलीले सत्ता हस्तान्तरणबारे बाहिर चलेका हल्लामा सत्यता नरहेको बताउँदै समय आउनुअघि नै नेपाली कांग्रेसका सभापति शेरबहादुर देउवालाई सत्ता सुम्पिने प्रतिबद्धता व्यक्त गर्नुभएको छ ।

उहाँले विदेशमा रहेका नेपालीलाई आफूले सिकेको ज्ञान, सीप र पुँजी लिएर स्वदेशको विकासमा लाग्न आह्वानसमेत गर्नुभयो ।

संयुक्त राष्ट्रसङ्घीय कार्यक्रम सकेर म्याड्रिडमा रहनुभएका प्रधानमन्त्री ओलीले मंगलबार राति नेकपा (एमाले) निकट प्रवासी नेपाली मञ्चका प्रतिनिधिहरूसँगको अन्तरक्रियामा उक्त कुरा बताउनुभएको हो । स्पेनका लागि नेपाली राजदूतको निवासमा आयोजित कार्यक्रममा प्रधानमन्त्री ओलीले वर्तमान गठबन्धन र आफ्नो पार्टीभित्र कुनै विवाद नरहेको स्पष्ट पार्नुभयो ।

उहाँले भन्नुभयो, “मुलुकलाई राजनीतिक निकास र स्थायित्व दिन विषम परिस्थितिमा पनि हामीले सहकार्य गरेका हौँ । हाम्रो समझदारीअनुसार नै सहज रूपमा सत्ता हस्तान्तरण हुन्छ ।”
भेटका क्रममा प्रधानमन्त्री ओलीले विदेशमा रहेका नेपालीहरूले आर्जन गरेको अनुभव र पुँजीलाई नेपालको समृद्धिमा लगाउन आग्रह गर्नुभयो ।

“नेपालमा विकासको लहर चलिरहेको छ, तपाईंहरूका लागि उपयुक्त अवसरहरू छन् । अब देश फर्केर पेसा-व्यवसायमा संलग्न हुनुहोस्,” उहाँले भन्नुभयो । कार्यक्रममा प्रधानमन्त्रीका मुख्य सल्लाहकार विष्णुप्रसाद रिमाल, स्पेनका लागि नेपाली राजदूत शनिल नेपाल तथा प्रवासी नेपाली मञ्चका युरोप र स्पेनका विभिन्न पदाधिकारीहरूको उपस्थिति रहेको थियो ।