भारतीय प्रधानमन्त्री मोदीद्वारा बिहार विधानसभामा आफ्नो गठबन्धनको ‘शानदार’ जितको दाबी
काठमाडौँ, कार्तिक २८ । भारतीय प्रधानमन्त्री नरेन्द्र मोदीले शुक्रबार बिहारमा सम्पन्न स्थानीय निर्वाचनमा आफ्नो पार्टी भारतीय जनता पार्टी (भाजपा) र यसका सहयोगीहरूले ‘शानदार’ विजय हासिल गरेको दाबी गर्दै परिणामका लागि सबै सहयोगीहरूको उच्च प्रशंसा गर्नुभएको छ ।१३ करोड जनसंख्या भएको यो पूर्वी भारतीय राज्यको चुनावी परिणामलाई नयाँ दिल्लीको बढ्दो अर्थतन्त्रको लाभ सबैभन्दा गरिब नागरिकसम्म पुर्याउने मोदीको क्षमताको परीक्षणका रूपमा हेरिएको थियो ।
मतगणना अझै जारी रहे पनि र अन्तिम नतिजा शनिबारसम्म सार्वजनिक हुने अपेक्षा गरिए पनि, निर्वाचन आयोगले आंशिक परिणाम र प्रक्षेपणहरूले राज्यको विधानसभामा मोदीको भाजपा र यसका सहयोगीहरूलाई ठोस बहुमत प्राप्त हुने संकेत दिएको छ । प्रधानमन्त्री मोदीले यस जितलाई ‘सुशासनको जीत’ भन्नुभएको छ। उहाँले सामाजिक सञ्जालमा लेख्नुभएको छ, “यो जनादेशले हामीलाई जनताको सेवा गर्न र बिहारका लागि नयाँ सङ्कल्पका साथ काम गर्न सशक्त बनाउनेछ ।”
बिहार हिन्दी भाषी उत्तर भारतको एक मात्र राज्य हो, जहाँ भाजपाले कहिल्यै एक्लै शासन गरेको छैन। यसपटक पनि उसले आफैंले बहुमत प्राप्त गर्ने सम्भावना छैन, तर गठबन्धन साझेदार जनता दल (युनाइटेड) लाई पनि पछि पार्दै सबैभन्दा ठूलो पार्टीको रूपमा उभिने देखिएको छ । निर्वाचन आयोगको तथ्याङ्क अनुसार, भाजपा र यसका साना सहयोगीहरूसँग मिलेर उनीहरूले राज्य विधायिकाको २४३ सिटमध्ये कम्तिमा तीन चौथाई सिट प्राप्त गर्ने देखिन्छ ।
विश्लेषकहरूले यस परिणामले आगामी वर्ष हुन लागेको अन्य क्षेत्रीय चुनावअघि मोदी र उहाँको पार्टीलाई थप बलियो बनाउन सक्ने बताएका छन्। छिमेकी मुलुक पाकिस्तानसँगको सशस्त्र द्वन्द्व र अमेरिकी करवृद्धिलगायत आर्थिक र विदेश नीतिका चुनौतीहरूको शृङ्खलापछि पनि यसले भारतीय नेतालाई बलियो स्थितिमा उभ्याउने अपेक्षा गरिएको छ ।
