सिरहामा आठ वर्षपछि अन्तरविद्यालय यु-१४ फुटबल प्रतियोगिता हुने
काठमाडौँ, पुस ६ । सिरहामा आठ वर्षको लामो अन्तरालपछि जिल्लास्तरीय अन्तरविद्यालय यु-१४ (१४ वर्ष मुनि) छात्र तथा छात्रा फुटबल प्रतियोगिता आयोजना हुने भएको छ । अखिल नेपाल फुटबल सङ्घ (एन्फा) सिरहाको आयोजनामा सोमबारदेखि लहानमा उक्त प्रतियोगिता सुरु हुन लागेको हो ।
एन्फा सिरहाले आइतबार पत्रकार सम्मेलन आयोजना गरी प्रतियोगिताबारे औपचारिक जानकारी दिएको छ । एन्फा सिरहाका संयोजक सरोजकुमार आलेले विद्यालय तहबाटै लुकेका प्रतिभाहरू पहिचान गरी उनीहरूको व्यावसायिक वृत्तिविकासमा सहयोग पुर्याउने उद्देश्यले प्रतियोगिता आयोजना गरिएको बताउनुभयो । उहाँका अनुसार जिल्लाका ६ वटा विद्यालयमा सञ्चालित ग्रासरुट प्रशिक्षणमा सहभागी खेलाडीहरूको क्षमता मापन गर्न यो प्रतियोगिताले मञ्च प्रदान गर्नेछ ।
१० टोली र १५ खेल
लहान नगरपालिका–१० स्थित खुला खेल मैदानमा सञ्चालन हुने यस प्रतियोगितामा कुल १० वटा टोलीको सहभागिता रहनेछ । प्रतियोगिता अवधिभर कुल १५ वटा खेल खेलाइनेछ, जसमा छात्रतर्फ १० र छात्रातर्फ ५ वटा प्रतिस्पर्धा हुने आयोजकले जनाएको छ ।
तयारी पूरा, सोमबार उद्घाटन
प्रतियोगिताको मुख्य प्रायोजक लहान मेरी चिल्ड्रेन एकेडेमी स्कुलका प्रबन्धक आयुश हमाल ठकुरीले प्रतियोगिताको प्राविधिक तथा व्यवस्थापकीय सम्पूर्ण तयारी पूरा भइसकेको जानकारी दिनुभयो । त्यस्तै, विद्यालय फुटबल सङ्घका पूर्वाञ्चल अध्यक्ष पाण्डव हमाल ठकुरीले लामो समयपछि हुन लागेको यो प्रतियोगिताले जिल्लाको खेलकुद क्षेत्रलाई पुनः चलायमान बनाउने विश्वास व्यक्त गर्नुभयो ।
आयोजकका अनुसार प्रतियोगिताको उद्घाटन सोमबार लहान नगरपालिकाका नगरप्रमुख महेशप्रसाद चौधरीले गर्नुहुनेछ । पुस १२ गतेसम्म चल्ने प्रतियोगिताको समापन समारोहमा युवा तथा खेलकुदमन्त्री बब्लु गुप्ताको प्रमुख आतिथ्यता रहने बताइएको छ । प्रतियोगिताको विजेता टोलीले १० हजार रुपियाँ नगदसहित ट्रफी, मेडल र प्रमाणपत्र प्राप्त गर्नेछ ।
