नागार्जुन उपमेयर कप तथा १२ औँ सितापाइला तेक्वान्दो फागुनको अन्तिम साता

काठमाडौँ, २७ माघ । नागार्जुन नगरपालिको सहयोग तथा सीतापाइला तेक्वान्दो डोजाङको आयोजनामा नागार्जुन उपमेयर कप १२ औं सीतापाइला काठमाडौं जिल्लास्तरीय तेक्वान्दो प्रतियोगिता फागुन २८ गतेदेखि हुने भएको छ ।

प्रतियोगितामा ४० डोजाङका करिब ६ सय खेलाडीको सहभागिता रहने आयोजक डोजाङका प्रमुख प्रशिक्षक एवं अध्यक्ष बब्लु सिवाकोटीले मंगलबार आयोजित पत्रकार सम्मेलनमा जानकारी गराए । गेरोगीमा चिल्ड्रेन, क्याडेट, जुनियर र सिनियर तथा पुम्सेमा क्याडेट, जुनियर र सिनियरमा गरी २८ स्वर्णका लागि भिडन्त हुनेछ ।

टिममा शीर्ष तीन स्थानमा रहनेले क्रमशः ५० हजार, ३० हजार र २० हजार नगद पुरस्कार प्राप्त गर्ने छन् । उत्कृष्ट पुरुष÷महिला खेलाडीलाई जनही १० हजार नगदबाट पुरस्कृत गरिने छ । अनुमानित २० लाख खर्च लाग्ने तीनदिने प्रतियोगिताका खेलहरु खोपाटोलमा खेलाइने छ ।

हृदय निकेतन इडुकेसनल पार्टनर

सो प्रतियोगिताको इडुकेसनल पार्टनर बाफलमा रहेको हृदय निकेतन रहेको छ । सीतापाइला डोजाङका अध्यक्ष शिवाकोटी रहृदय निकेतनका प्रिन्सिपल करणसिंह गोयलाले सम्झौतापत्रमा हस्ताक्षर गर्नुभयो । सो सम्झौताअनुसार हरेक स्पर्धाका स्वर्ण विजेतालाई बाफलस्थित हृदय निकेतनले प्लस टु अध्ययन गर्न पूर्ण छात्रवृत्ति प्रदान गर्नेछ ।

सीतापाइला डोजाङ र लेजिड ब्रडर्सबिच साझदारी

सो कार्यक्रममा अध्यक्ष सिवाकोटीले सीतापाइला डोजाङ र अस्ट्रेलियाको लेजिड ब्रडर्सबिच पनि तेक्वान्दोसम्बन्धी साझेदारी भएको जानकरी दिनुभयो । उहाँका अनुसार सीतापाइल डोजाङका खेलाडी अस्ट्रेलियामा हुने अन्तर्राष्ट्रिय प्रतियोगितामा सहभागी हुँदा लेजिड ब्रडर्सले र अस्ट्रेलियाका खेलाडी नेपाल आउँदा सीतापाइला डोजाङले सहयोग गर्ने सम्झौता भएको बताउनुभयो । लेजिड ब्रडर्स अस्ट्रेलियाको सिड्नीमा रहेको छ ।

पत्रकार सम्मेलनमा लेजिड ब्रडर्सका प्रतिनिधि एवं हृदय निकेतनका सञ्चालक सुसन दुलाल, तार्केश्वर नगर खेलकुद विकास समितिका उपाध्यक्ष फिरोज श्रेष्ठ, तेक्वान्दोका अन्तर्राष्ट्रिय निर्णायक राजन भण्डारीलगायतको उपस्थिति रहेको थियो ।