नयाँ शैक्षिक सत्र वैशाख २ देखि: देशभर धमाधम पाठ्यपुस्तक पुर्याइँदै, पाँच दिनमा २५ लाख बिक्री गर्ने
काठमाडौँ, २१ चैत । आगामी वैशाख २ गतेदेखि प्रारम्भ हुने नयाँ शैक्षिक सत्रका लागि देशभरका विद्यालयहरूमा पाठ्यपुस्तक पुर्याउने कार्यले तीव्रता पाएको छ। सरकारी स्वामित्वको जनक शिक्षा सामग्री केन्द्रले मुद्रण कार्य सम्पन्न गरी देशका विभिन्न भागमा धमाधम पुस्तक वितरण गरिरहेको छ।
केन्द्रका अनुसार गत चैत १६ गतेदेखि सुरु भएको वितरण प्रक्रियाअन्तर्गत पहिलो पाँच दिनमै २५ लाख थान पाठ्यपुस्तक बिक्री भइसकेको छ। शैक्षिक सत्र सुरु हुनुअगावै विद्यार्थीको हातहातमा पुस्तक पुर्याउने सरकारी लक्ष्यअनुसार यसपटक उत्पादन र ढुवानीलाई प्रभावकारी बनाइएको केन्द्रका प्रबन्ध सञ्चालक यदुनाथ पौडेलले जानकारी दिनुभयो।
यसैबीच, शिक्षामन्त्री सस्मित पोखरेलले शुक्रबार भक्तपुरस्थित केन्द्रको कार्यालय र प्रेसको स्थलगत अवलोकन गर्नुभएको छ। अनुगमनका क्रममा मन्त्री पोखरेलले केन्द्रको उत्पादन क्षमता र हालसम्मको प्रगतिको जानकारी लिनुभएको थियो।
सो अवसरमा केन्द्रले यस वर्ष पाठ्यपुस्तकको कुनै अभाव नहुने प्रतिबद्धता व्यक्त गरेको छ। विगतका वर्षहरूमा शैक्षिक सत्र सुरु भइसक्दा पनि पुस्तक नपुग्ने समस्या भोग्दै आएका विद्यार्थी र अभिभावकहरूलाई यसपटकको तयारीले राहत दिने अपेक्षा गरिएको छ। केन्द्रले देशभरका आफ्ना डिपो र आधिकारिक बिक्रेताहरूमार्फत वितरण कार्यलाई सुचारु राखेको छ।
