महोत्तरीमा हावाहुरीले रुख ढल्दा गुडिरहेको अटो र स्कुटी किचिए: २ जनाको मृत्यु, ४ घाइते

जनकपुरधाम, ५ वैशाख । महोत्तरीको जलेश्वर नगरपालिकास्थित प्रकौली क्षेत्रमा शनिबार साँझ आएको हावाहुरीका कारण सडक किनारको रुख ढल्दा दुई जनाको मृत्यु भएको छ भने चार जना गम्भीर घाइते भएका छन् । जलेश्वरबाट जनकपुरतर्फ जाँदै गरेका एउटा अटो र स्कुटीमाथि गुडिरहेकै अवस्थामा रुख खसेपछि उक्त दुर्घटना भएको हो ।

जिल्ला प्रहरी कार्यालय महोत्तरीका अनुसार हावाहुरीका कारण सडक अवरुद्ध हुने गरी रुख ढल्दा त्यहीँ गुडिरहेका सवारी साधनहरू किचिएका थिए । दुर्घटना लगत्तै स्थानीय बासिन्दा र सुरक्षाकर्मीको टोलीले घाइतेहरूको उद्धार गरी उपचारका लागि प्रादेशिक अस्पताल जनकपुर पठाएको छ ।

जिल्ला प्रहरी कार्यालयका प्रवक्ता एवं प्रहरी नायब उपरीक्षक (डीएसपी) शैलेन्द्र भट्टले मृतक र घाइतेहरूको पहिचान खुल्न बाँकी रहेको जानकारी दिनुभयो । “हावाहुरीले गर्दा राजमार्गमा अचानक रुख ढल्दा यो अप्रत्याशित दुर्घटना हुन पुगेको हो,” डीएसपी भट्टले भन्नुभयो, “मृतकहरूको सनाखत गर्ने र घाइतेहरूको उपचार व्यवस्थापन गर्ने कार्य भइरहेको छ ।”

प्रत्यक्षदर्शीका अनुसार हावाहुरीका कारण सडकमा रुख ढलेपछि केही समय सो खण्डमा यातायात समेत अवरुद्ध भएको थियो । प्रहरीले अहिले सडकबाट रुख पन्छाएर आवागमन सुचारु गर्ने प्रयास गरिरहेको छ । घटनाको विस्तृत विवरण आउन बाँकी रहेको प्रहरीले जनाएको छ ।